Падчас разгляду ў Вярхоўным судзе апеляцыі Аляксандра Жыльнікава і Вячаслава Сухарко, якія атрымалі смяротны прысуд за забойства трох чалавек, стала вядома аб выкананні прысуду ў дачыненні да двух іншых смяротнікаў, перадае TUT.BY.
Падчас працэсу Вячаслаў Сухарко распавёў, што правёў у камеры смяротнікаў чатыры месяцы.
«Я сядзеў у камеры смяротнікаў, у якіх прысуд ужо ўступіў у сілу. З 15 на 16 траўня забралі з камеры Міхаленю і Летава», — распавёў Вячаслаў Сухарко.
Па традыцыі, улады Беларусі не паведамляюць аб выкананні смяротных прысудаў. Пра гэта ўдаецца дазнацца толькі з паказанняў іншых смяротнікаў альбо ад праваабаронцаў, якія кантактуюць з роднымі асуджаных.
33-гадовы Аляксей Міхаленя быў прыгавораны да пакарання смерцю за забойства двух суседзяў-пенсіянераў. Забойства адбылося ў сакавіку 2016 года ў Нароўлі: у двары прыватнага дома знайшлі 59-гадовага пенсіянера, а ў склепе — яго 61-гадовую сястру. Абвінавачаны раней быў судзімы за крадзеж і забойства ў падлеткавым узросце.
Пра прысуд 31-гадоваму Віктару Летаву, пра які стала вядома ад праваабаронцаў, расказаў першы намеснік старшыні Вярхоўнага суда Беларусі Валерый Калінковіч. Паводле яго слоў, ён быў вынесены восенню 2017 года, злачынства адбылося ў ВК-13 у Глыбокім.
«Ніхто гэтага смяротніка не хаваў. Справа разглядалася ў адкрытым рэжыме, інфармацыя пра гэта друкавалася ў адкрытым доступе. На жаль, чалавек здзейсніў ужо трэцяе забойства ў сваім жыцці, адбываючы пакаранне за забойства», — распавёў Калінковіч.
Цяпер чытаюць
У расійскай арміі беларускага наёмніка павесілі на дрэве ўніз галавой і білі палкай па геніталіях1
Каментары