Прарасійская партыя пацярпела балючую паразу на выбарах у Малдове
Прарасійскія сацыялісты набіраюць толькі 31% галасоў пасля апрацоўкі 97% бюлетэняў. Гэта нашмат менш, чым разлічваў іх лідар, прэзідэнт Ігар Дадон.
У праеўрапейскай апазіцыйнай кааліцыі «Зараз» — 26% галасоў, у іншай праеўрапейскай Дэмакратычнай партыі Малдовы — каля 24% галасоў. Яшчэ 8% набірае партыя бізнэсоўца Ілана Шора.
За дэмакратаў прагаласавала большасць сельскіх раёнаў. Сацыялістаў падтрымалі вялікія гарады, дзе жыве шмат выхадцаў з Расіі.
«Зараз» найбольш набірае ў Кішынёве і тых раёнах, скуль паходзяць яго лідары. Гэтая палітычная сіла збіраецца вывесці людзей на паслявыбарчыя пратэсты.
Партыя Шора — гэта асобны выпадак. Шор нарадзіўся ў Ізраілі, але робіць бізнэс на радзіме сваіх бацькоў у Малдове. Ён атрымаў 7,5 гадоў турмы за крадзеж грошай з банкаўскай сістэмы, але гэта не перашкодзіла яму здабыць папулярнасць у пэўных колах.
Траціна месц у сацыялістаў — гэта не той вынік, на які разлічвала Масква. «Спутнік-Малдова» напярэдадні выбараў публікаваў звесткі «сацапытанняў», якія давалі сацыялістам амаль палову галасоў.
У аднамандатных акругах большасць мандатаў забяруць прадстаўнікі цяперашняй «партыі ўлады» — Дэмакратычнай. Але і лідары апазіцыі ўпэўнена перамаглі ў сваіх: Андрэй Нэстасэ з «Зараз» — у прыгарадах Кішынёва, Мая Санду з «Зараз» — на акрузе для выбарцаў-эмігрантаў, а Зінаіда Грачаная з Партыі сацыялістаў на сваёй радзіме на поўначы Малдовы.
Калі не будзе вялікіх змен пры канчатковым падліку галасоў, Сацыялісты атрымаюць 35 мандатаў, Дэмакратычная партыя — 30, «Зараз» — 26 месцаў, партыя Шора — 7. Яшчэ 3 мандаты здабылі беспартыйныя кандыдаты. Усяго ў парламенце Малдовы — 101 месца.
Можна прагназаваць, што Дэмакратычная партыя мультымільянера Улада Плахатнюка па выніках выбараў застанецца пры ўладзе. Пытанне, з кім яна ўвойдзе ў кааліцыю гэтым разам. Звяртае на сябе ўвагу таксама высокі вынік кааліцыі «Зараз», якога яна дасягнула пасля таго як апазіцыйныя партыі здолелі аб'яднацца за два месяцы да выбараў.
Цяпер чытаюць
«Жэня пагадзіўся на будоўлю, а не ваяваць. І толькі калі выйдзе з запою!»: як прадалі ў расійскую армію жыхара Лёзна. Ахвяра не адна6
Каментары