«Тое, што я казаў — прапісныя ісціны хрысціянства». Гродзенскі святар у час службы выказаўся пра выбары
«Прызнаюся, што для мяне стала поўнай нечаканасцю ваша рэакцыя, і станоўчая, і адмоўная, на мой учорашні каментар для вернікаў», — так пракаментаваў сваё выказванне на нядзельнай службе настаяцель Свята-Пакроўскага сабора Георгій Рой. Святар 2 жніўня звярнуўся да вернікаў з нагоды прэзідэнцкіх выбараў, піша hrodna.life
Відэа слоў настаяцеля з’явілася на канале сабора ў YouTube і за суткі набрала больш за тысячу праглядаў. У каментарах у посце на Facebook у Георгія Роя шмат слоў падзякі.
«Дарагія сябры і нядобразычліўцы! Прызнаюся, што для мяне стала поўнай нечаканасцю ваша рэакцыя, і станоўчая, і адмоўная, на мой учорашні каментар для вернікаў адносна маючых адбыцца выбараў. Тое, што я гаварыў — гэта прапісныя ісціны хрысціянства, тысячу разоў напісаныя і сказаныя да мяне. Відаць, з намі сапраўды штосьці не так, калі самыя простыя, можна сказаць, катэхізісныя сцвярджэнні становяцца ледзь не сенсацыяй», — напісаў на сваёй старонцы ў Facebook Георгій Рой.
2 жніўня на нядзельнай службе святар нагадаў вернікам, што, згодна з Бібліяй, бацькам хлусні ёсць д’ябал, і заклікаў вернікаў ніколі не далучацца да яе, «дзе б яна ні праяўлялася».
«Шмат перажыванняў у кожнага з нас, каб былі мір і спакой у нашай краіне. А міру і спакою можна дасягнуць толькі тады, калі ёсць справядлівасць. Калі парушаецца прынцып справядлівасці ў грамадстве, тады ўзнікаюць розныя супярэчнасці, якія правакуюць самыя негатыўныя наступствы. Калі парушаецца прынцып праўды — гэта таксама тое, што правакуе людзей на рэзкія крокі, рэзкія думкі, рэзкія словы», — сказаў Георгій Рой.
Каментары