На сустрэчы «нармандскай чацвёркі» хочуць вызначыць дату перамоваў Украіны з «ЛНР» і «ДНР»
Сёння, 26 студзеня, дарадцы лідараў краін «нармандскага фармату» сустрэнуцца ў Парыжы. Яны могуць дамовіцца пра дату перамоваў Украіны з сепаратыстамі аб статусе Данбаса, паведамляе DPA са спасылкай на крыніцы ў Елісейскім палацы.
Палітычныя дарадцы лідараў «нармандскай чацвёркі» — Нямеччыны, Францыі, Украіны і Расіі павінны сустрэцца ў сераду, 26 студзеня, у Парыжы. Падчас кансультацый, у прыватнасці, «хочуць вызначыць дату, калі Украіна правядзе перамовы з сепаратыстамі аб асаблівым статусе Данбаса», паведамляе агенцтва dpa са спасылкай на крыніцы ў Елісейскім палацы 25 студзеня.
Па гэты дзень Украіна афіцыйна адхіляла любыя ініцыятывы па перамовах з прадстаўнікамі самаабвешчаных рэспублік на Данбасе. Кіеў бачыць за сталом перамоваў толькі РФ як бок канфлікту, піша Deutsche Welle.
Таксама, як адзначае DPA, падчас перамоваў дарадцаў ў Парыжы гаворка пойдзе пра «гуманітарныя меры і меркаванні адносна будучыні Украіны».
Прэзідэнт Францыі Эмануэль Макрон плануе 28 студзеня правесці перамовы з Уладзімірам Пуціным па дээскалацыі канфлікту вакол Украіны. У Елісейскім палацы лічаць, што добрым сігналам дээскалацыі, у прыватнасці, стаў бы ціск з боку Расіі на сепаратыстаў, каб правесці перамовы з Кіевам аб статусе Данбаса.
Факт перамоваў палітычных дарадцаў у Парыжы пацвердзіў і кіраўнік Офіса прэзідэнта Украіны Андрэй Ярмак. Па яго словах, на іх гаворка пойдзе аб рэжыме спынення агню на Данбасе, а таксама аб кожным з пунктаў Мінскіх пагадненняў. Пры гэтым Ярмак чакае, што падчас перамоваў Нямеччына і Францыя будуць займаць праактыўную пазіцыю.
7 студзеня Макрон разам з нямецкім бокам ініцыяваў новую сустрэчу ў «нармандскім фармаце».
Да гэтага Расія адмовілася ад сустрэчы міністраў замежных спраў у «нармандскім фармаце», якую Францыя прапанавала правесці восенню 2021 года ў Парыжы. Пасля МЗС РФ апублікаваў дыпламатычную перапіску паміж расійскім, нямецкім і французскім міністрамі замежных спраў. Гэта патлумачылі тым, што пазіцыя і падыходы РФ да правядзення міністэрскай сустрэчы ў «нармандскім фармаце» нібыта падвяргаюцца скажэнням.
Апошнім разам краіны «нармандскай чацвёркі» праводзілі сустрэчу ў фармаце відэаканферэнцыі на ўзроўні кіраўнікоў МЗС у лістападзе 2020 года. Да гэтага лідары дзяржаў сустракаліся ў Парыжы ў снежні 2019 года пасля трохгадовага перапынку.
24 студзеня на пазачарговым пасяджэнні Кабінет міністраў Украіны адклікаў законапраект «Аб асновах дзяржаўнай палітыкі пераходнага перыяду», ухвалены урадам яшчэ 4 жніўня 2021 года. «Такое рашэнне звязана з неабходнасцю яго грунтоўнай дапрацоўкі ў адпаведнасці з заключэннем Еўрапейскай камісіі «За дэмакратыю праз права» (Венецыянскай камісіі) ад 15 кастрычніка 2021 года», — тлумачыцца на сайце ўкраінскага ўрада.
Па словах віцэ-прэм'ер-міністра, міністра па пытаннях рэінтэграцыі часова акупаваных тэрыторый Украіны Ірыны Верашчук, акрамя шэрагу крытычных заўваг ад Венецыянскай камісіі, таксама існуе недастатковая падтрымка бягучай рэдакцыі праекта з боку дэпутацкага корпуса і спецыялістаў.
Гаворка ідзе пра законапраект аб дзяржаўнай палітыцы пераходнага перыяду на часова акупаваных тэрыторыях Данецкай і Луганскай абласцей, а таксама Аўтаномнай Рэспублікі Крым і Севастопаля.
Давід і Галіяф: параўноўваем сілы расійскай і ўкраінскай армій
Байдэн, Джонсан і лідары краін ЕС абмеркавалі беспрэцэдэнтны пакет санкцый супраць Расіі
Цяпер чытаюць
«Адны вераць, што вернуцца, іншыя — не». Як працуе беларуская школа ў Польшчы1
Каментары