«Настолькі разумны, што па ўзроўні развіцця скончыў ВНУ». Лукашэнка распавёў пра будучыню сына Мікалая
Аляксандр Лукашэнка прызнаўся, што пакуль не ведае, кім стане яго сын Мікалай, аднак, па яго словах, малодшы з трох сыноў ужо настолькі разумны, што «па ўзроўні развіцця скончыў ВНУ». Пры гэтым усе дзеці Лукашэнкі таксама прэзідэнцтва «ўжо наеліся».
Падчас гутаркі з Лукашэнкам расійскі прапагандыст Салаўёў спытаў, якая будучыня чакае яго сыноў, калі той перастане быць прэзідэнтам.
Лукашэнка стаў хваліць свайго малодшага сына.
«Гэта наогул хлопец таленавіты. Што вельмі важна, мы цяпер з Пуціным абмяркоўваем, бо ён на вачах у нас вырас. Ён [Мікалай] — біёлаг і хімік. Ніхто не скажа, што Лукашэнка яго там цягне за нешта, і спецыялісты, якія яго тэстуюць, часта (я прашу Акадэмію навук), кажуць, што ён ужо ВНУ скончыў, яму няма чаго рабіць у ВНУ. Па біялогіі, ты ўяўляеш!» — сказаў ён у інтэрв'ю Уладзіміру Салаўёву.
— Гэта значыць, вы бачыце яго навукоўцам? — удакладніў вядучы.
— Я, шчыра кажучы, ніяк яго не бачу, — адказаў Лукашэнка.
— Гэта значыць, што абярэ сам? — спытаў Салаўёў.
— Так, я чакаю яго гэтай рэакцыі, — сказаў Лукашэнка.
— Калі ён захоча пайсці па вашых слядах…, — удакладніў Салаўёў.
— Крый божа, — адказаў Лукашэнка.
— Калі будуць крычаць, што Беларусь стала манархіяй, бацька перадаў сыну, любімы анекдот апазіцыі: да Колі будуць кіраваць, — працягнуў расійскі вядучы.
—Шчыра, мае дзеці ўжо наеліся прэзідэнцтва, — адказаў Лукашэнка і распавёў пра тое, што яго сын Віктар добраахвотна папрасіўся сысці з дзяржслужбы. Ён займаў пасаду ў дзяржсакратарыяце Рады бяспекі, быў памочнікам бацькі.
Па словах Лукашэнкі, малодшы сын Мікалай «катэгарычна наеўся» прэзідэнцтва. Ён згадаў, як браў яго на МЗКЦ, дзе Лукашэнка асвісталі рабочыя і крычалі яму «Сыходзь!» у жніўні 2020 года.
«Калі б ты яго бачыў, калі мы на заводзе на гэтым былі, вось МЗКЦ, наш ваенны завод, на яго [Мікалая] было страшна глядзець. Ён упершыню ўбачыў вось гэты натоўп, што крычаў. Ядро было 400 чалавек. Ну сабраліся ўсе гэтыя бандыты, а вакол рабочыя сядзелі…. Ён калі гэта ўбачыў, а я, стоячы на гэтым п'едэстале, бокам паглядзеў на яго і пашкадаваў, што яго з сабой узяў. Гэта быў злом», — сказаў Лукашэнка.
Таксама Лукашэнка распавёў, што Мікалай выдатна валодае зброяй. «Нядаўна з Пуціным спаборнічаў па стральбе і выйграў, хоць Пуцін выдатна страляе», — пахваліўся Лукашэнка.
Каментары