Біл Гейтс назваў будучую вялікую пагрозу для чалавецтва. З яго ацэнкай згодзен Інтэрпал
Яшчэ раней ён цалкам прадказаў з'яўленне «глабальнай эпідэміі».
Мультымільярдэр, філантроп, адзін з заснавальнікаў карпарацыі Microsoft Біл Гейтс папярэдзіў, што самым сур'ёзным выклікам для чалавецтва стане біятэрарызм. Пра гэта 14 лютага паведаміла агенцтва Euronews са спасылкай на інтэрв'ю мільярдэра журналісту BBC.
У гэтым інтэрв'ю Біл Гейтс растлумачыў, чаму лічыць біятэрор пагрозай і чым ён адрозніваецца ад пандэмій.
«Біятэрор і пандэмія аднолькава падвяргаюць чалавецтва небяспечным і смяротным захворванням, аднак ад біятэрарызму складаней абараніцца, бо яго адэпты робяць гэта свядома і лепш ведаюць вашыя слабыя месцы», — адзначыў Гейтс.
Такую ж пазіцыю займае Інтэрпал, сцвярджаючы, што тэракты біялагічнай скіраванасці здольныя сеяць больш страху і разбурэнняў, чым звычайныя.
«Пагроза біятэрарызму існуе: актуальныя звесткі ўказваюць на тое, што асобныя тэрарыстычныя групы і злачынцы маюць як магчымасці, так і намер выкарыстоўваць біялагічныя кампаненты для прычынення шкоды грамадству», — паведамляе Інтэрпал.
Па звестках арганізацыі, падобныя напады могуць адбыцца дзе заўгодна і без папярэджання. Падчас іх могуць быць скарыстаны бактэрыі сібірскай язвы, якая амаль заўсёды прыводзіць да смерці людзей і жывёл. Напрыклад, у ЗША ў 2001 годзе сібірскай язвай праз пошту наўмысна заразілі больш за два дзясяткі чалавек, пяць з якіх памерлі ад хваробы.
Нагадаем, што Біл Гейтс яшчэ ў 2015 годзе папярэдзіў аб будучай глабальнай эпідэміі. Таксама падчас нядаўняга інтэрв'ю агенцтву BBC мільярдэр пракаментаваў той факт, што ён стаў цэнтрам тэорыі змовы аб таямнічым з'яўленні каранавіруса.
«Я гэтага не чакаў. Падчас пандэміі былі дзясяткі мільёнаў паведамленняў аб тым, што я наўмысна выклікаў яе ці адсочваю людзей праз вакцыны. Гэта праўда, што я звязаны з вакцынамі, але я фінансую іх, каб ратаваць жыцці. Я думаю, што людзі шукаюць «пугалку» за заслонай альбо празмерна спрошчанае тлумачэнне рэальнасці. Відаць, эмоцыі злосці нашмат лягчэй зразумець, чым асновы біялогіі», — сказаў ён.
Каментары