Вальфовіч пра народнае апалчэнне: Ім выдадуць стралковую зброю, якая будзе захоўвацца пры іх
Старшыня Рады бяспекі Аляксандр Вальфовіч у эфіры «Беларусь 1» расказаў, як, на думку кіраўніцтва лукашэнкаўскага рэжыму, мае будавацца народнае апалчэнне, якое на гэтым тыдні абмяркоўвалі з удзелам Лукашэнкі.
Паводле Вальфовіча, фармаваць народнае апалчэнне будуць мясцовыя органы ўлады, а кіраваць яго атрадамі — аддзяленні ўнутраных спраў. Задачы апалчэння ў выпадку ваеннага становішча — «абарона парадку, барацьба з бандытызмам і марадзёрствам, дыверсійна-разведвальнымі групамі».
Можна меркаваць, што ў апалчэнне, калі да яго фармавання справа сапраўды дойдзе, будуць набіраць самых правераных прыхільнікаў рэжыму, бо ім мяркуецца аказваць надта вялікі давер:
«Ім будзе выдадзеная стралковая зброя. Зброя будзе захоўвацца пры іх. Жыць яны будуць і харчавацца дома», — сказаў Вальфовіч.
Прымаць рашэнне аб тым, каго браць у народнае апалчэнне, будуць кіраўнікі мясцовай улады: старшыні абласных, раённых выканкамаў і гэтак далей. У іх будзе «шырокае поле магчымасцяў» у прыняцці рашэння аб тым, ці можна выдаваць чалавеку зброю.
«Будуць вывучаныя катэгорыі грамадзян», — абяцае кіраўнік лукашэнкаўскай Рады бяспекі.
Паводле яго, у гэтае апалчэнне будуць браць і жанчын, калі яны будуць адпавядаць патрабаванням.
Звальняцца з працы для нясення службы ў апалчэнні не будзе патрэбна, але па рашэнні мясцовага кіраўніка апалчэнцы будуць на нейкі час вызваляцца ад працы для выканання абавязкаў у дружынах. Заробак пры гэтым будзе захоўвацца.
Пры гэтым служба ў апалчэнні не вызваляе грамадзяніна ад вайсковай службы: пры неабходнасці тыя, хто да яе прыдатны, могуць быць мабілізаваныя і ў войска.
Чытайце таксама:
У народнае апалчэнне могуць увайсці да 150 тысяч чалавек
Лукашэнка абмяркоўвае закон пра народнае апалчэнне
Вальфовіч анансаваў змены ў Канцэпцыі нацбяспекі
У Суле адзначылі Купалле. Гасцей было столькі, што на дарогах утварыліся заторы6
Каментары