Колькі і прасіў пракурор: у Мінску асудзілі стрыечнага брата намесніка камандзіра палка Каліноўскага
У Мінскім гарадскім судзе 27 красавіка вынесены прысуд па крымінальнай справе палітзняволенага Сяргея Франчука, якога абвінавацілі у абразе Лукашэнкі (ч. 1 арт. 368 КК), абразе прадстаўніка ўлады (арт. 369), распальванні сацыяльнай варожасці і варажнечы (ч. 1 арт. 130), а таксама ў арганізацыі і падрыхтоўцы дзеянняў, якія груба парушаюць грамадскі парадак (ч. 1 арт. 342 КК), паведамляе «Вясна».
Справу разглядаў суддзя Яўген Пісарэвіч, дзяржабвінаваўца — Раманенка.
Сяргей Франчук — стрыечны брат намесніка камандзіра палка Кастуся Каліноўскага Вадзіма Кабанчука. Быў затрыманы 9 жніўня 2022 года. Вядома, што яго забралі з кватэры бацькоў у Бабруйску, дзе мужчына жыў апошнім часам. У гэты дзень бацькі Сяргея былі на лецішчы, і 5 чалавек з мінскага АМАПа ўварвалася ў кватэру, ударылі яго пісталетам па галаве, правялі вобшук, забралі мабільны тэлефон, ноўтбук і самога Сяргея Франчука.
Cпачатку ён быў асуджаны на 15 сутак нібыта за непадпарадкаванне. Таксама з'явілася «відэа», дзе Франчук прызнаецца, што ўдзельнічаў у акцыях пратэсту 2020 года і рабіў каментары ў «экстрэмісцкіх» тэлеграм-чатах. Пры гэтым лоб мужчыны залеплены. Пасля заканчэння арышту Сяргея не выпусцілі на волю, а накіравалі ў мінскі ізалятар на Акрэсціна.
Суд пачаўся 20 красавіка.
Па матэрыялах абвінавачання, Франчук у адным з тэлеграм-чатаў пакінуў абразлівыя каментары ў адрас Юрыя Караева і Аляксандра Лукашэнкі. Таксама 27 верасня 2020 года прымаў актыўны ўдзел у несанкцыянаваным масавым мерапрыемстве ў Мінску на вуліцы Багдановіча, выходзіў на праезную частку вуліцы, парушаў працу грамадскага транспарту. У якасці доказу выкарыстаныя фотаздымкі, знойдзеныя ў ягоным тэлефоне.
Дзяржабвінаваўца канчаткова запрасіў для Сяргея Франчука тры гады пазбаўлення волі ў калоніі ва ўмовах агульнага рэжыму.
Суд пагадзіўся з прапановай дзяржабвінаваўцы і асудзіў Франчука на тры гады пазбаўлення волі ў калоніі ва ўмовах агульнага рэжыму.
Чытайце таксами:
Выйшаў на волю Андрэй Несцяровіч
Жыхара Ваўкавыска затрымалі за тое, што ён нібыта «абразіў міліцыянтаў з Дняпра»
Цяпер чытаюць
«Я наведаў самую ізаляваную краіну Еўропы». Амерыканскі блогер расказаў, як прыязджаў у Беларусь у 2020-м і 2024-м4
Каментары