Студэнты Полацкага ўніверсітэта пра арыштаваных выкладчыкаў: «Некаторых ужо звольнілі задняй датай»
Паводле студэнтаў Полацкага дзяржаўнага ўніверсітэта, ім ніхто не тлумачыць, з якой прычыны ва ўстанове адмяняюцца некаторыя заняткі, але ўсё зразумела і так, піша «Віцебская вясна».
Студэнтам, напрыклад, самім давялося шукаць выкладчыка фізкультуры Сяргея Рыкуна, які ў прызначаны час не з'явіўся на кафедры фізічнага выхавання. Урэшце маладым людзям паведамілі, што «Сяргей Пятровіч звольніўся». Але адначасова па ВНУ прайшла інфармацыя, што малады выкладчык асуджаны на 15 сутак разам з некаторымі іншымі калегамі.
На 15 сутак асуджаныя таксама Сяргей Глазырын, дацэнт кафедры канстытуцыйнага права і дзяржаўнага кіравання, і дацэнт кафедры гісторыі і турызму Віктар Чараўко. 10 сутак арышту маюць адбыць выкладчыца кафедры сусветнай літаратуры і замежных моў Алена Храмцова і дацэнтка кафедры геадэзіі і геаінфармацыйных сістэм Галіна Шараглазава.
Пералік затрыманых і асуджаных выкладчыкаў пакуль не поўны, але ёсць звесткі, што іх колькасць пасля аблавы ў ПДУ 23 і 24 мая можа сягаць 15 чалавек.
Невядомыя і лёсы тых, хто цяпер знаходзіцца на «сутках»: ёсць верагоднасць, што да выкладчыцкай дзейнасці яны ўжо не вернуцца. Падобныя выпадкі ўжо былі: праз тое, што трапілі пад арышты падчас паслявыбарчых падзей 2020 года, ці праз тое, што не сталі хаваць сваёй грамадзянскай пазіцыі, з ПДУ былі вымушаныя сысці дацэнт, кандыдат гістарычных навук Віктар Якубаў, старшы выкладчык кафедры архітэктуры і кіраўнік аддзела дызайну і кіравання брэндам ПДУ Андрэй Вярыга, доктар гістарычных навук, этнограф Уладзімір Лобач.
Адміністрацыя навучальнай установы папярэдзіла студэнтаў пра недапушчальнасць публічных каментароў пра падзеі ва ўніверсітэце, таму звесткі адтуль праточваюцца толькі праз нефармальную камунікацыю.
Цяпер чытаюць
Лукашэнка: Мы хочам з Пакістана спецыялістаў, а не проста моладзь. І найперш у Баранавічы12
Каментары