Украіна паведаміла пра падазраванага ў расстрэле мірных жыхароў у Бучы. Гэта расійскі вайсковы наводчык-аператар
У сераду офіс Генеральнай пракуратуры Украіны паведаміў пра падазраванага, які, паводле версіі следства, расстраляў мірных жыхароў у двух цывільных аўтамабілях. Гэта адбылося ў Бучы Кіеўскай вобласці ў сакавіку 2022 года падчас расійскай акупацыі.
Генпракуратура сцвярджае, што гэта 24-гадовы расійскі вайсковец, намеснік камандзіра, наводчык-аператар БМД-2 з бартавым нумарам 111, які служыў у 76 гвардзейскай дэсантна-штурмавой Чарнігаўскай дывізіі ПДВ РФ, піша Бі-бі-сі.
Яму інкрымінавана парушэнне законаў і звычаяў вайны, спалучанае з наўмысным забойствам (ч. 2 арт. 28, ч. 2 арт. 438 КК Украіны).
Па даных следства, раніцай 5 сакавіка 2022 года па ўказанні камандзіра калона баявых машын расійскай арміі пачала рух з тэрыторыі дзіцячага лагера «Прамяністы» ў напрамку лясной зоны каля вёскі Здзвіжаўка.
Маршрут пралягаў па вуліцы Леха Качыньскага да горада Буча. Насустрач вайсковай калоне выехалі два аўтамабілі з мірнымі жыхарамі, у тым ліку з двума дзецьмі. Па загадзе расійскіх камандзіраў быў адкрыты агонь з 30 мм аўтаматычнай гарматы 2А42 па транспартных сродках, сцвярджаюць украінскія следчыя.
Чатыры чалавекі атрымалі смяротныя раненні: маці, двое малалетніх дзяцей і іх сусед, — іншыя былі параненыя.
Зараз вядуцца працэсуальныя дзеянні па прыцягненні да адказнасці іншых саўдзельнікаў ваеннага злачынства.
Цяпер чытаюць
20‑гадовую дзяўчыну з аграгарадка Макраны на мяжы з Украінай асудзілі за Гаюна5
20‑гадовую дзяўчыну з аграгарадка Макраны на мяжы з Украінай асудзілі за Гаюна
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі1818
Каментары