Амбасадары краін Еўрасаюза ў сераду, 21 чэрвеня, узгаднілі чарговы пакет санкцый супраць Расіі ў сувязі з уварваннем ва Украіну, паведаміла пастаяннае прадстаўніцтва Швецыі ў ЕС.
Адзінаццаты з пачатку вайны санкцыйны пакет, які еўрапейскія дыпламаты рыхтавалі больш за два месяцы, будзе накіраваны на спыненне спосабаў абыходу ўжо ўведзеных санкцыйных мер.
Акрамя таго, будуць пашыраны чорныя спісы фізічных асоб, якім будзе забаронены ўезд у Еўрасаюз і чые актывы на тэрыторыі ЕС будуць заблакаваныя.
Амбасадар Польшчы пры ЕС Анджэй Садась паведаміў, што ў новы пакет уключаныя абмежавальныя меры супраць 70 фізічных і 30 юрыдычных асоб, а таксама, забарона на ўезд прычэпаў з Расіі.
Паводле яго слоў, 11-ы пакет санкцый прадугледжвае таксама забарону транспарціроўкі нафты па паўднёвай галінцы нафтаправода «Дружба». Цяпер гэта адзіная галінка «Дружбы», па якой расійская нафта паступае ў Еўропу, і яна часткова праходзіць па тэрыторыі Беларусі.
Апошні перад гэтым, дзясяты, пакет санкцый ЕС супраць Расіі быў прыняты 25 лютага. Пад абмежаванні тады трапіла 96 арганізацый.
Цяпер чытаюць
Колькасць судоў па палітычных крыміналках зменшылася ў разы19
Каментары