Гэтая галіна за наступныя дзесяць гадоў напалову павялічыць свой уклад у сусветную эканоміку. Што за яна?
Па звестках Сусветнай рады па падарожжах і турызме, гэтая галіна да 2033 года павінна стаць індустрыяй з абаротам у 15,5 трлн даляраў, што на 50% больш за паказчык 2019 года. Колькасць занятых ёй складзе 430 мільёнаў чалавек. Пры гэтым чакаецца змена сусветнага лідара.
Сусветная рада па падарожжах і турызме (WTTC) падрыхтавала 10-гадовы прагноз развіцця галіны.
Як піша Bloomberg, у справаздачы аналізуецца эканамічны ўклад асноўных сусветных турыстычных рынкаў і называецца пяцёрка самых магутных эканомік у галіне падарожжаў і турызму станам на 2022 год з пункта гледжання ўкладу ў ВУП.
Яны засталіся такімі ж, як і да 2019 года: ЗША, Кітай, Германія, Вялікабрытанія і Японія, прычым Японія за тры гады абагнала Вялікабрытанію.
У дзясятку таксама ўвайшлі Францыя, Мексіка, Італія, Індыя і Іспанія.
У справаздачу таксама ўключаныя даныя аб укладзе галіны падарожжаў і турызму ў рынак працы: у цэлым да 2033-га ў галіне будзе занята да 430 мільёнаў чалавек у параўнанні з 334 мільёнамі ў 2019 годзе.
Гэта складае прыкладна кожнае дзявятае працоўнае месца ў свеце. Толькі ў ЗША да 2033 года ў галіне падарожжаў і турызму будзе працаваць 21 мільён чалавек, або кожны восьмы па ўсёй краіне.
Эканамісты заўважаюць, што галіна падарожжаў і турызму расце нашмат хутчэй, чым эканоміка ў цэлым.
Калі чаканы рост сусветнага ВУП прагназуецца прыкладна на ўзроўні 2,6% на год, то ў гэтай галіне — 5,1%.
Спецыялісты таксама прагназуюць і змену лідара галіны. Калі зараз гэта ЗША з гадавым аб'ёмам вытворчасці ў 2 трыльёны долараў, то праз дзесяць гадоў ім стане Кітай.
Прагназуецца, што ў 2033 годзе турыстычны сектар Кітая прынясе 4 трыльёны долараў і складзе 14,1% кітайскай эканомікі.
А вось у ЗША гэтыя лічбы будуць больш сціплымі — 3 трыльёны долараў і 10,1% эканомікі. Гэтыя паказчыкі адлюстроўваюць як суму, якую замежныя наведвальнікі трацяць унутры краіны, так і тое, колькі грамадзяне кожнай краіны выдаткоўваюць на свае паездкі за мяжу.
Акрамя таго, да 2033 года доля Кітая ў сусветных выдатках на выязныя падарожжы дасягне 22,3%.
Чытайце яшчэ:
Цяпер чытаюць
Ездзілі шукаць нават у БССР, а неапазнанае цела 30 гадоў ляжала ў спецсховішчы. Новыя дэталі загадкавага знікнення ў ЗША беларускага пісьменніка Міколы Цэлеша22
Каментары