Палітвязня, якога не выпусцілі пасля заканчэння тэрміну, асудзілі па новай крымінальнай справе
У судзе Ленінскага раёна Гродна з 10 жніўня па 1 верасня разглядалі новую крымінальную справу супраць палітвязня Дзмітрыя Сушчыка. Гэтым разам яго абвінавацілі паводле арт. 411 Крымінальнага кодэкса (злоснае непадпарадкаванне патрабаванням адміністрацыі турмы). Суддзя Наталля Козел прызнала Дзмітрыя вінаватым і прызначыла яму ў дадатак да паўтара гадоў зняволення яшчэ адзін год і 15 дзён калоніі. Пры гэтым Дзмітрый павінен быў у жніўні выйсці на волю, цалкам адбыўшы тэрмін, але быў зноў затрыманы па новай справе і змешчаны пад варту, піша «Вясна».
Жыхара Навагрудка Дзмітрыя Сушчыка 17 лютага 2022 года затрымалі расійскія памежнікі, калі той спрабаваў выехаць з Беларусі. Праваабаронцам вядома, што пасля затрымання з ім праводзілі «допыт» у лесе, падчас якога ўжывалі псіхалагічны і фізічны гвалт. Ужо праз месяц Дзмітрыя асудзілі паводле ч. 1 арт. 368 КК (абраза Лукашэнкі) і арт. 370 КК (здзек з дзяржаўных сімвалаў) на паўтара года калоніі.
Тэрмін палітвязень адбываў у аршанскай калоніі №8, дзе адразу пасля прыбыцця на яго пачалі ціснуць: змяшчалі ў ШІЗА, а потым перавялі ў ПКТ.
У пачатку верасня 2022 года ў Оршы адбыўся суд па ўзмацненні рэжыму палітвязню. Па рашэнні суда Дзмітрыя перавялі на турэмны рэжым і накіравалі ў гродзенскую турму №1. Па прыбыцці туды яму адразу было выпісана два парушэнні, пасля чаго мужчыну змясцілі ў ШІЗА.
Тэрмін адбыцця пакарання ў Дзмітрыя заканчваўся 18 жніўня, але ён застаўся пад вартай у межах новай крымінальнай справы.
У судзе Ленінскага раёна Гродна 10 жніўня 2023 года над палітвязнем распачаўся суд паводле арт. 411 КК (злоснае непадпарадкаванне патрабаванням адміністрацыі турмы). Справу разглядала суддзя Наталля Козел.
Ужо 1 верасня суд прызначыў яму ў дадатак да паўтара гадоў калоніі яшчэ адзін год і 15 дзён пазбаўлення волі.
Цяпер чытаюць
Сталі вядомыя жахлівыя абставіны смерці былога вучонага сакратара Інстытута гісторыі. Яму было 45 гадоў34
Сталі вядомыя жахлівыя абставіны смерці былога вучонага сакратара Інстытута гісторыі. Яму было 45 гадоў
Яе не хацелі браць у музычную школу, а ў 14 яна сыграла ў Карнегі-холе ў Нью-Ёрку. Беларуская скрыпачка — пра жыццё ў Лондоне, заробкі і чым скрыпка Страдывары за 14 мільёнаў еўра адрозніваецца ад звычайнай1414
Каментары