Выйшаў на волю Андрэй Андрэеў. Яго асудзілі па справе напалоханага салдата
Андрэй Андрэеў — ураджэнец Гомеля, але быў затрыманы 2 сакавіка 2022 года ў Мінску.
26 верасня, цалкам адбыўшы пакаранне, на волю выйшаў палітзняволены Андрэй Андрэеў. Ён ураджэнец Гомеля, але затрыманы быў 2 сакавіка 2022 у Мінску, дзе працаваў інжынерам у «Белдзяржпраекце», піша «Гомельская вясна».
Андрэя Андрэева і Аляксандра Комара прызналі вінаватымі ў здзяйсненні «злачынства» па артыкуле 364 КК «гвалт альбо пагроза ўжывання гвалту ў дачыненні да супрацоўніка органаў унутраных спраў» і 29 жніўня 2022 года асудзілі на два гады калоніі ва ўмовах узмоцненага рэжыму.
Усё іх «злачынства» палягала ў тым, што падчас антываеннага мітынгу, які праходзіў 27 лютага 2022 г. ў Мінску, маладыя людзі ішлі па ходніках насустрач цалкам экіпіраванаму салдату Міхаілу Круту, а той чамусьці пачаў адступаць.
На відэа, якое зафіксавала гэты выпадак, бачна, што маладыя людзі ішлі на вялікай адлегласці ад салдата, нічога не прадпрымалі: не абражалі, агрэсіўна не паводзіліся. Гэта не зашкодзіла суддзі Мінскага гарадскога суда Дзіне Кучук прызнаць іх вінаватымі і адправіць у калонію.
Палітвязень адбываў пакаранне ў магілёўскай калоніі.
Цяпер чытаюць
На Мінскім паўмарафоне памёр 50‑гадовы бягун. Вось што вядома пра Аляксея Дашыневіча6
Каментары