Журналісты пула Караніка прывезлі аленям 2,5 тоны гнілой садавіны. Жывёлы есці не сталі
У тыкток-канале фотажурналіста пула кіраўніка Гродзенскай вобласці Уладзіміра Караніка выклалі відэа, як аленяў спрабуюць накарміць зацвілымі апельсінамі, авакада, манга, заўважыў Hrodna.life.
Арцём Турлай, фотажурналіст пула Караніка распавядае, што яны прывезлі 2,5 тоны садавіны і гародніны.
На відэа бачныя перцы, агуркі, пекінская капуста, памідоры, шмат апельсінаў, мандарыны, ёсць манга і нават памела. Але ўсё гэта багацце моцна сапсаванае, у цвілі, а са скрыняў цячэ цёмная вадкасць. Усім гэтым вырашылі накарміць аленяў.
«Прывезлі аленям чатыры кантэйнеры садавіны па 700 кг. Авакада, агуркі, перац, баклажаны, мандарыны, памела, грушы і яблыкі», — падпісаў аўтар відэа.
«Ласункі мы выгрузілі. Усё распакавалі і цяпер ідзём ва ўкрыццё — будзем глядзець, прыйдуць алені есці ці не», — патлумачыў тое, што адбываецца ў відэа, Арцём Турлай.
Алені сапраўды выйшлі з лесу, але есці не сталі.
Скуль узяліся 2,5 тоны сапсаваных прадуктаў, у відэа не ўдакладняюць.
У каментарах да відэа людзі дзівяцца, што аленяў кормяць цытрусавымі, і адзначаюць, што ў іх пасля гэтага будуць праблемы.
«Мы былі ў заапарку, хацелі агурком пакарміць, работнікі сказалі аленю агурок нельга, кармілі ягадамі», — напісала дзяўчына. «Мы спрабавалі пакарміць аленяў мандарынамі, іх адпуджваў пах цытрусавы. А хлеб елі)», — падзялілася іншая.
Людзі адзначалі шкоду цвілі для жывёл. «Спадзяюся, ніхто з жывёл не загінуў», — хвалюецца каментатар.
«Смакоцце з цвіллю. Многім жывёлам нельга цытрусавыя. Авакада асабліва, іх костачкі атрутныя для іх. Зрабіў дабро называецца», — напісалі ў канале.
«Нават алені не захацелі пратэрміноўку есці», — рэзюмаваў нехта.
Цяпер чытаюць
Анжаліка Мельнікава тыдзень правяла на Шры-Ланцы і вылецела з дзецьмі ў Дубай28
Каментары