Адшукаць іх можна як у Мінску, так і ў Магілёве.
У Дзяржаўны спіс гісторыка-культурных каштоўнасцей унесены цэлы шэраг габеленаў народнага мастака Беларусі Аляксандра Кішчанкі. Пра гэта паведаміў тэлеграм-канал «Спадчына».
Некаторыя з твораў Кішчанкі і раней былі пад аховай дзяржавы. Гэта габелены «Музыка» ў Музычным каледжы імя Глінкі, габелен-заслона ў Оперным тэатры і найбольш вядомы «Габелен Веку», які праз свае памеры — 19 на 14 метраў, — быў унесены ў кнігу рэкордаў Гінэса як найвялікшы ў свеце.
Выявілася, што тэатральная заслона — толькі частка з серыі габеленаў, створаных Кішчанкам у 1970-1980-я гады для Опернага тэатра. Астатнія габелены раскіданыя па іншых установах, куды, як мяркуюць аўтары канала, яны маглі трапіць у час апошняй рэканструкцыі Опернага тэатра — савецкаму мастацтву не знайшлася месца ў лоску і бляску абноўленых інтэр'ераў.
У Беларускай акадэміі мастацтваў адшукаліся яшчэ тры габелены з гэтай серыі: «Беларусь», «Музыка», «Скарына» (першыя чатыры фота), якім цяпер прысвоены статус помнікаў мастацтва рэспубліканскага значэння (2-я катэгорыя).
Яшчэ больш габеленаў з серыі адшукалася ў Магілёве: гэта «Космас», «Рэвалюцыя», «Песняры», а таксама два велізарныя габелены для фае (11,5х11,12 і 11,4х11,3 м). Але як яны выглядаюць — невядома.
Сёння яны захоўваюцца ў Палацы культуры Магілёўскай вобласці, адкуль у час рэканструкцыі да Форума рэгіёнаў Беларусі і Расіі, які праходзіў у 2018 годзе, павыкідалі ўвесь «савецкі хлам», то-бок усё дэкаратыўна-манументальнае мастацтва: столі з трохмерных элементаў, габелены, літыя металічныя перагародкі, люстры з літога шкла і наборныя драўляныя пано на сценах. Большасць проста выламалі і вывезлі на сметнік.
Невядома і што стала з вялікім габеленам «Мой родны край» Славы Сакалова і Зоі Літвінавай, заслужанай мастачкі Беларусі, які ўпрыгожваў фае палаца. Сёння ўсе інтэр'еры будынка зроблены ў стылі «дорага-багата», а габелены, напэўна, пыляцца ў кладоўках.
Цяпер чытаюць
Міліцыя затрымала таго самага расійскага турыста, які кінуў недакурак на вуліцы. Заўтра суд28
Каментары