У харэаграфічным ансамблі «Харошкі» змянілася кіраўніцтва. Мастацкім кіраўніком калектыву стала Ірына Грушава. Яе прозвішча з'явілася на сайце калектыву.
Грушава — артыстка балета вышэйшай катэгорыі, у «Харошках» працуе амаль чвэрць стагоддзя, піша «Люстэрка».
Новае прызначэнне азначае, што сваёй пасады пазбавілася Валянціна Гаявая, якая была мастацкім кіраўніком з моманту стварэння калектыву. 50 гадоў таму, у студзені 1974 года, у Мінску пры Белдзяржфілармоніі пачаў працу ансамбль «Харошкі». Яго стваральнікамі сталі харэографы Валянціна Гаявая і Мікалай Дудчанка. Гаявая заставалася нязменнай мастацкай кіраўніцай ансамбля.
За гады працы «Харошкі» сталі адным з сімвалаў краіны, свайго роду візітнай карткай Беларусі. Ансамбль больш за 20 разоў браў удзел у розных міжнародных фестывалях. Выступаў у Даніі, Сірыі, Іарданіі, Фінляндыі, Англіі, Бельгіі, Японіі, Індыі, Італіі, Іспаніі, Польшчы, Германіі, Францыі, ЗША, на Кіпры.
Але ў апошнія гады ансамбль знаходзіцца ў крызісе. У кастрычніку 2020 года «Харошкі» выступілі ў будынку Купалаўскага тэатра, адкуль да гэтага звольнілася практычна ўся трупа.
Валянціне Гаявой сёлета споўніцца 88 гадоў.
Каментары