Інтэрпал выключыў са свайго «чырвонага спісу» рэжысёра Андрэя Гнёта. Але гэта яшчэ не канец справы

Генеральны сакратарыят Інтэрпала ў электронным лісце паведаміў прадстаўніцтву Еўрасаюза ў Сербіі аб тым, што падстаў для знаходжання беларускага рэжысёра і журналіста Андрэя Гнёта ў міжнароднай базе Інтэрпала або ў red notices for wanted persons няма.

Інтэрпал прызнае палітычную падкладку справы журналіста.

Як вынікае з ліста, знаходжанне Андрэя Гнёта ў «чырвоным» спісе супярэчыць артыкулам 2 і 3 статута Міжнароднай арганізацыі крымінальнай паліцыі.

Згодна з артыкулам 2, Інтэрпал мае на мэце забяспечваць «шырокае ўзаемадзеянне крымінальнай паліцыі ў рамках дзейнага заканадаўства краіны і ў духу Усеагульнай дэкларацыі правоў чалавека».

Артыкул 3 падкрэслівае: «Арганізацыі катэгарычна забараняецца ажыццяўляць якое-небудзь ўмяшанне або дзейнасць палітычнага, вайсковага, рэлігійнага або расавага характару».

Сам Андрэй Гнёт з гэтага факту задаволены, але не хавае свайго здзіўлення:

«Тут, вядома, у мяне ёсць пытанні да Інтэрпала. Як адбываецца так, што вы спачатку арыштоўваеце чалавека і саджаеце яго ў турму, ён змагаецца з экстрадыцыяй, а потым вы ўжо разбіраецеся і кажаце: «Ой, дык мы ж свой уласны статут парушаем!». Гэта даволі абсурдная сітуацыя».

Нягледзячы на гэты ліст Інтэрпала, пагроза пераследу ў Беларусі для Гнёта не знятая, бо пагроза экстрадыцыі з Сербіі ў Беларусь для яго застаецца.

Як кажа Андрэй Гнёт, вынік справы пакуль непрадказальны:

«Гэта як казіно. Калі я размаўляў з дыпламатамі краін ЕС, адзін з іх заўважыў: «Андрэй, гэта справа ляжыць у палітычнай плоскасці, будзеш ты выступаць на судзе ці не будзеш, танцаваць, спяваць, жартаваць — усё гэта не мае ніякага сэнсу. Ты можаш рабіць на судзе што заўгодна. Гэта проста цалкам палітычная справа».

41-гадовы Андрэй Гнёт — рэжысёр тэлерэкламы і музычных кліпаў, журналіст. Займаўся вытворчасцю відэапрадукцыі для аб'яднання SOS.by, якое ў Беларусі прызнана «экстрэмісцкім фарміраваннем».

Мужчына быў затрыманы 30 кастрычніка 2023 года памежнай службай Сербіі, калі прыляцеў у Бялград, пасля чаго перададзены паліцыі. Прычына затрымання — знаходжанне ў міжнародным вышуку на запыт беларускага бюро Інтэрпала ад 21 верасня 2023 года. Ведамства прасіла экстрадзіраваць Гнёта ў Беларусь для крымінальнага пераследу.

Спачатку мужчыну было вырашана выдаць Беларусі, але 12 сакавіка 2024 года Апеляцыйны суд у Белградзе адмяніў гэтую пастанову. Пасля гэтага справа аб экстрадыцыі Андрэя Гнёта пераглядалася яшчэ некалькі разоў.

• 5
• 0
• 0
• 0
• 0
• 0
• 0
• 0