Interpał vyklučyŭ sa svajho «čyrvonaha śpisu» režysiora Andreja Hniota. Ale heta jašče nie kaniec spravy

Hienieralny sakrataryjat Interpała ŭ elektronnym liście paviedamiŭ pradstaŭnictvu Jeŭrasajuza ŭ Sierbii ab tym, što padstaŭ dla znachodžańnia biełaruskaha režysiora i žurnalista Andreja Hniota ŭ mižnarodnaj bazie Interpała abo ŭ red notices for wanted persons niama.

Interpał pryznaje palityčnuju padkładku spravy žurnalista.

Jak vynikaje ź lista, znachodžańnie Andreja Hniota ŭ «čyrvonym» śpisie supiarečyć artykułam 2 i 3 statuta Mižnarodnaj arhanizacyi kryminalnaj palicyi.

Zhodna z artykułam 2, Interpał maje na mecie zabiaśpiečvać «šyrokaje ŭzajemadziejańnie kryminalnaj palicyi ŭ ramkach dziejnaha zakanadaŭstva krainy i ŭ duchu Usieahulnaj dekłaracyi pravoŭ čałavieka».

Artykuł 3 padkreślivaje: «Arhanizacyi kateharyčna zabaraniajecca ažyćciaŭlać jakoje-niebudź ŭmiašańnie abo dziejnaść palityčnaha, vajskovaha, relihijnaha abo rasavaha charaktaru».

Sam Andrej Hniot z hetaha faktu zadavoleny, ale nie chavaje svajho ździŭleńnia:

«Tut, viadoma, u mianie jość pytańni da Interpała. Jak adbyvajecca tak, što vy spačatku aryštoŭvajecie čałavieka i sadžajecie jaho ŭ turmu, jon zmahajecca z ekstradycyjaj, a potym vy ŭžo raźbirajeciesia i kažacie: «Oj, dyk my ž svoj ułasny statut parušajem!». Heta davoli absurdnaja situacyja».

Niahledziačy na hety list Interpała, pahroza pieraśledu ŭ Biełarusi dla Hniota nie źniataja, bo pahroza ekstradycyi ź Sierbii ŭ Biełaruś dla jaho zastajecca.

Jak kaža Andrej Hniot, vynik spravy pakul niepradkazalny:

«Heta jak kazino. Kali ja razmaŭlaŭ z dypłamatami krain ES, adzin ź ich zaŭvažyŭ: «Andrej, heta sprava lažyć u palityčnaj płoskaści, budzieš ty vystupać na sudzie ci nie budzieš, tancavać, śpiavać, žartavać — usio heta nie maje nijakaha sensu. Ty možaš rabić na sudzie što zaŭhodna. Heta prosta całkam palityčnaja sprava».

41-hadovy Andrej Hniot — režysior telerekłamy i muzyčnych klipaŭ, žurnalist. Zajmaŭsia vytvorčaściu videapradukcyi dla abjadnańnia SOS.by, jakoje ŭ Biełarusi pryznana «ekstremisckim farmiravańniem».

Mužčyna byŭ zatrymany 30 kastryčnika 2023 hoda pamiežnaj słužbaj Sierbii, kali prylacieŭ u Białhrad, paśla čaho pieradadzieny palicyi. Pryčyna zatrymańnia — znachodžańnie ŭ mižnarodnym vyšuku na zapyt biełaruskaha biuro Interpała ad 21 vieraśnia 2023 hoda. Viedamstva prasiła ekstradziravać Hniota ŭ Biełaruś dla kryminalnaha pieraśledu.

Spačatku mužčynu było vyrašana vydać Biełarusi, ale 12 sakavika 2024 hoda Apielacyjny sud u Biełhradzie admianiŭ hetuju pastanovu. Paśla hetaha sprava ab ekstradycyi Andreja Hniota pierahladałasia jašče niekalki razoŭ.

• 5
• 0
• 0
• 0
• 0
• 0
• 0
• 0