Лукашэнка прапанаваў змякчыць шэраг крымінальных артыкулаў. Але «палітычных» гэта не будзе тычыцца
Аляксандр Лукашэнка ўнёс у парламент законапраект «Аб змяненні кодэксаў па пытаннях крымінальнай адказнасці», якім прадугледжваецца змяншэнне пакарання па некаторых артыкулах, паведамляе яго прэс-служба.
Распрацоўкай законапраекта займалася спецыяльна створаная пры Адміністрацыі рабочая група, якая правяла сістэмны аналіз нормаў крымінальнага і Крымінальна-працэсуальнага законаў, на аснове даручэнняў, дадзеных Лукашэнкам 11 студзеня. У выніку выпрацаваныя і рэалізаваныя ў рамках законапраекта наступныя падыходы.
Перагледжаны санкцыі 97 складаў злачынстваў. З іх 65 дапоўнены альтэрнатыўнымі больш мяккімі відамі пакаранняў (24 склады злачынстваў сёння ўтрымліваюць пазбаўленне волі як адзіна магчымае пакаранне). Яшчэ ў 32 унесены карэкціроўкі, у тым ліку для ліквідацыі дысбалансу ў санкцыях.
Паведамляецца, што ўзмацняецца гуманістычны складнік крымінальнага закона. Вызначаецца, што тыя, хто ўпершыню ўчыніў няцяжкія злачынствы: жанчыны і адзінокія мужчыны, якія выхоўваюць дзяцей ва ўзросце да 14 гадоў, а таксама непаўналетнія і інваліды I групы — ім пазбаўленне волі не прызначаецца.
Выключэнне будуць складаць выпадкі, калі асоба здзейсніла злачынства экстрэмісцкай скіраванасці або звязанае з ужываннем гвалту.
Аналагічныя правілы прадугледжаны ў частцы заключэння пад варту.
Пераводзяцца ў справы прыватна-публічнага абвінавачвання (калі заводзіцца справа па заяве пацярпелага) злачынствы аб парушэнні правілаў дарожнага руху, што пацягнула прычыненне шкоды блізкім сваякам або членам сям'і вінаватай асобы (ч.2 арт. 317 КК). Гэтая мера закліканая спрыяць унутрысямейнаму ўрэгуляванню канфлікту.
Законапраектам скарэктаваныя таксама нормы аб адказнасці за нарказлачынствы.
Прадугледжваюцца альтэрнатыўныя больш мяккія пакаранні ў выглядзе арышту на тэрмін да трох месяцаў за набыццё або захоўванне наркотыкаў (ч.1 арт. 328 КК); абмежаванні свабоды за разавыя выпадкі іх збыту (ч. 2 арт. 328 КК).
Адначасова змяншаецца ніжні памер пакарання за збыт наркотыкаў у складзе арганізаванай групы з 10 да 8 гадоў пазбаўлення волі (ч.4 арт. 328).
Зазначаецца, што адпаведныя меры дазволяць судам больш гнутка падыходзіць да пытанняў прызначэння пакарання з улікам грамадскай небяспекі злачынства і асобы вінаватага.
Далейшая праца над законапраектам будзе ажыццяўляцца на пляцоўцы парламента.
Цяпер чытаюць
«Пра сустрэчу Луку заўсёды прасілі перадаць Пуціну». Шустэр расказаў, як Лукашэнка прапаноўваў свае паслугі амерыканцам6
Каментары