Былы ўдзельнік One Direction загінуў, зваліўшыся з трэцяга паверха гатэля ў Аргенціне
Брытанскі спявак і былы ўдзельнік поп-гурта One Direction Ліам Пэйн быў знойдзены мёртвым у Аргенціне, паведамілі мясцовыя ўлады. Паводле паліцыі, 31-гадовы музыка выпаў з трэцяга паверха гатэля Casa Sur у Буэнас-Айрэсе, піша Бі-бі-сі.
На месца здарэння прыбылі экстраныя службы, але на той момант Пэйн, знойдзены ў двары гасцініцы, ужо памёр.
«Ліам Джэймс Пэйн, кампазітар і гітарыст, былы ўдзельнік гурта One Direction, загінуў сёння пасля падзення з трэцяга паверха гатэля ў раёне Палерма», — гаворыцца ў заяве паліцыі.
Паведамляецца, што да гэтага ў паліцыю паступіла паведамленне пра «агрэсіўныя паводзіны мужчыны, меркавана, які знаходзіўся пад уздзеяннем наркотыкаў ці алкаголю».
Кіраўнік гарадской службы хуткай медыцынскай дапамогі SAME Альберта Крэсэнці паведаміў мясцоваму тэлебачанню, што ў выніку падзення спявак атрымаў «вельмі цяжкія траўмы, несумяшчальныя з жыццём».
У сталіцу Аргенціны Пэйн прыляцеў на канцэрт іншага былога ўдзельніка One Direction Найла Хорана. Улады Аргенціны пачалі расследаванне і высвятляюць прычыны здарэння.
«Мы падтрымліваем кантакт з мясцовымі ўладамі ў сувязі са справаздачамі аб смерці брытанскага грамадзяніна ў Аргенціне», — гаворыцца ў паведамленні Форын-офіса.
Ліам Пэйн, які нарадзіўся 29 жніўня 1993 года, двойчы быў удзельнікам брытанскага тэлевізійнага шоу X Factor — у 2008 і 2010 гадах. У першы раз суддзя і музычны прадзюсар Сайман Коўэлл параіў яму спачатку скончыць школу, а затым зноў выступіць на конкурсе. У 2010 годзе ён вярнуўся на X Factor і выканаў песню Cry Me a River Джасціна Цімберлэйка, чым уразіў усіх суддзяў. Пасля гэтага ён далучыўся да іншых канкурсантаў — Найла Хорана, Зэйна Маліка, Гары Стайлза і Луі Томлінсана, і яны разам стварылі гурт One Direction.
Гурт не выйграў X Factor, але стаў адным з самых паспяховых у гісторыі поп-музыкі і прадаў больш за 70 мільёнаў альбомаў па ўсім свеце. У 2016 годзе гурт спыніў выступленні, пасля чаго Пэйн і іншыя ўдзельнікі заняліся сольнымі праектамі.
«Ліам быў ключавым удзельнікам гурта. Ён дапамагаў пісаць шмат песень, і, вядома, пасля распаду One Direction у яго была вельмі паспяховая сольная кар'ера», — адзначае музычны аглядальнік BBC Марк Сэвідж.
У 2017 годзе дэбютны сольны сінгл Пэйна Strip That Down заняў трэцяе месца ў брытанскім чарце, а яго сумесная праца з Рытай Орай For You, якая стала саўндтрэкам да фільма Пяцьдзясят адценняў свабоды, увайшла ў топ-10. Ліам Пэйн некаторы час знаходзіўся ў шлюбе з папулярнай брытанскай спявачкай і былой удзельніцай гурта Girls Aloud Шэрыл Коул, якая ў 2017 годзе нарадзіла ад яго сына.
Цяпер чытаюць
«Я сказаў на відэа, што мяне не катуюць — на той момант гэта было праўдай. А пасля мяне білі дзве гадзіны». Украінскі журналіст два гады правёў у расійскім палоне — вось што ён перажыў1
Каментары