У Карме блогер захапляўся верталётам Лукашэнкі. Цяпер яго судзілі за экстрэмізм
Аляксандр Петрачкоў быў зоркай раённай прапаганды, але зараз атрымаў адміністратыўку.
Кармянскага блогера Аляксандра Петрачкова судзілі па адміністрацыйным артыкуле за «распаўсюджванне, выраб, захоўванне, перавозку інфармацыйнай прадукцыі, якая змяшчае заклікі да экстрэмісцкай дзейнасці, альбо якая прапагандуе такую дзейнасць», імаверна, за рэпосты. Рашэнне, якое вынес старшыня суда Кармянскага раёна Андрэй Аўсейцаў, пакуль невядомае, паведаміла «Гомельская Вясна».
Петрачкоў вядомы як праўладны блогер і актывіст, яго прасоўвала раёнка «Зара на Сожам». Рэдакцыя называла яго «мясцовай знакамітасцю» і нават вырабіла для Петрачкова імянны бэйдж з QR-кодам-спасылкай на ягоны акаўнт, піша «Флагшток».
Аляксандр актыўна асвятляў праўладныя мерапрыемствы, а таксама быў дружыннікам — змагаўся з парушальнікамі парадку і «ліквідаваў наступствы вячэрніх сустрэч моладзі».
Петрачкоў актыўна вёў інстаграм на 1194 падпісчыкі. Адзін з яго апошніх пастоў прысвечаны «Дажынкам» з удзелам Лукашэнкі.
Блогер апублікаваў фота верталёта з подпісам: «Гістарычны момант! Верталёт Прэзідэнта Рэспублікі Беларусь Аляксандра Лукашэнкі над Кармяншчынай! Кармянцы, якія зведалі буру радасных эмоцый ад сустрэчы з Кіраўніком дзяржавы, лічаць гэта шчаслівым знакам!»
Інстаграм Петрачкова не абнаўляецца ўжо больш за тыдзень.
Каментары