Замежнікі скардзяцца — у беларускі ўніверсітэт не паступіш без пасярэднікаў
Студэнты-замежнікі — ужо традыцыйная крыніца грошай для беларускіх універсітэтаў. Але калі едзеш у Беларусь па дыплом, часта мусіш заплаціць і агенцтвам-пасярэднікам, прычым цэны даходзяць да соцень даляраў. Паступіць без агенцтваў зможа не кожны.
Пра свой досвед з агенцтвамі напісаў карыстальнік сацсеткі Reddit. У публікацыі ён расказаў, што жадае вучыцца ў Беларусі, але мае праблему — універсітэты прымушаюць яго звяртацца да агентаў-пасярэднікаў.
Гэтыя агенты патрабуюць выплаціць ім наперад шмат грошай. Аўтар паста не жадае гэтага рабіць, бо не ведае, ці можа ён давяраць агенцтвам, і таму хацеў бы паступіць ва ўніверсітэт без пасярэднікаў або знайсці надзейнага агента. Замежнік адпраўляў лісты наконт паступлення ў розныя ўніверсітэты, але нідзе яму не адказалі.
Вось што ён здолеў даведацца:
«Некаторыя студэнты кажуць, што ўніверсітэты ставяць агентаў у прыярытэт, бо тыя вырашаюць усе пытанні з паперамі, візамі і жыллём. Мне сказалі, што мне можа спатрэбіцца тры тысячы даляраў наяўнымі ў аэрапорце на розныя выплаты і выдаткі па жыллю».
Адзін з каментатараў, грамадзянін Ірака з досведам навучання ў Гродна, піша, што паміж агентамі і ўніверсітэтамі існуе дамоўленасць — нібыта калі агент паспяхова рэгіструе студэнта ва ўніверсітэце і выконвае ўсе фармальнасці, універсітэт сплочвае яму частку (каля 400 даляраў) ад тых грошай, якія студэнт плаціць за першы семестр навучання.
«Хутчэй за ўсё, вы будзеце сутыкацца з гэтым непарадкам толькі ў першым семестры. З другога семестра, падабаецца вам гэта ці не, вам давядзецца спраўляцца з усім самастойна — здагадайцеся, чаму? Універсітэты плацяць гэтым агентам, толькі калі тыя паспяхова зарэгіструюць новых студэнтаў. Таму калі вы звернецеся да агента па дапамогу ў другім семестры, ён ніколі не адрэагуе».
У каментарах таксама згадваюць турэцкае агенцтва, якое працуе з будучымі студэнтамі МДЛУ. Паводле словаў аднаго з карыстальнікаў, ён сэканоміў 1500 даляраў, таму што напісаў у сам універсітэт і паступіў туды без дапамогі агенцтва.
Знайсці такія агенцтвы ў сеціве нескладана. Да прыкладу, на старонцы так званага Belarus Admission Center пералічаныя прычыны, чаму замежнікам трэба ехаць у Беларусь па «найлепшую ў Еўропе адукацыю». Гэта тое, што беларускія дыпломы быццам бы прызнаюцца па ўсім свеце і адукацыя ў Беларусі мае добрую якасць.
Таксама агенты пішуць, што ў Беларусі ёсць шырокі выбар курсаў для навучання, і цэны такія, што замежнікі могуць сабе дазволіць. У дадатак, замежнікаў прымаюць у беларускія ўніверсітэты без сертыфікатаў, якія даказвалі б веданне англійскай мовы.
Студэнты-замежнікі часта прыязджаюць у Беларусь па медычную адукацыю, і БДМУ не хавае свайго супрацоўніцтва з агенцтвамі-пасярэднікамі. На англамоўнай старонцы сайта ёсць цэлы спіс такіх агенцтваў, дзе пазначана — медуніверсітэт мае з імі пагадненні па супрацоўніцтве ў рэкрутынгу, накіраванні і запрашэнні замежнікаў на навучанне. Праўда, БДМУ падкрэслівае на той самай старонцы, што не мае з гэтымі пасярэднікамі фінансавых адносінаў.
На старонцы аднаго з гэтых партнёраў, Word Platinum International, знаходзім інфармацыю пра цэны іх паслуг для замежнікаў. Гаворка пра курсы рускай мовы ў БДТУ — гэта не вышэйшая адукацыя, але затое зразумела, з якімі сумамі працуе агенцтва.
Напрыклад, вы жыхар Турцыі і жадаеце месяц павучыцца рускай мове ў БДТУ. Па абяцаннях агенцтва, яно падрыхтуе для вас усе дакументы, дапаможа з візай і квіткамі са Стамбула ў Мінск і назад, забяспечыць медычныя агляды і пражыванне ў студэнцкім інтэрнаце, будзе дапамагаць з пытаннямі падчас навучання і міграцыйнымі праблемамі.
Усё гэта будзе каштаваць 1220 даляраў.
«Наша Нiва» — бастыён беларушчыны
ПАДТРЫМАЦЬЦяпер чытаюць
На пратэстанцкі фестываль у «Чыжоўку-Арэну» едзе амерыканскі прапаведнік Франклін Грэм. Разам з ім чакаюць Коўла з жонкай14
Каментары