Да беларусаў, якія запісаліся на падачу ў польскія візавыя цэнтры, іх супрацоўнікі маюць непрыемныя пытанні

Паводле інфармацыі тыкток-акаўнта @nashivpolshe, візавыя цэнтры Польшчы «зладзілі пазапланавую праверку». У прыватнасці, гаворка ідзе пра візавы цэнтр Мінскай консульскай акругі.

«Яны тэлефануюць кліентам, якія запісаліся на снежань у візавыя цэнтры Мінска, Магілёва і Гомеля, і просяць пацвердзіць рэгістрацыю. Для гэтага пытаюцца, ці самастойна запісваўся чалавек, ці праз агенцтва. Калі праз агенцтва, гэты запіс могуць ануляваць», — расказвае вядучы тыкток-акаўнта @nashivpolshe. — Калі чалавек кажа, што запісваўся сам, падчас званка яму на пошту высылаюць код пацвярджэння, які трэба ім агучыць. Адпаведна, калі ў вас няма доступу да пошты, з якой вы рэгістраваліся ці вас рэгістравалі, то ваш запіс таксама могуць ануляваць».

Пра падобную сітуацыю расказвае і тыкток-акаўнт @kat_visa.

«Візавы цэнтр польскі стаў нечакана абзвоньваць людзей з пытаннем аб тым, якім чынам вы запісаліся [на падачу] і з якой пошты рэгістраваліся. Вельмі многія, натуральна, разгубіліся. Хто сказаў, што рэгістраваўся з нечай дапамогай, адразу атрымалі ануляванне запісу, — апісвае сітуацыю вядучая тыкток-акаўнта. — Вельмі сумная гісторыя. Вельмі крыўдна за людзей, якія доўга чакалі. Цяпер ім прыйдзецца запісвацца нанова. Але самае крыўднае, што людзі, якія маглі рэгістравацца самастойна, робячы проста шмат поштаў і не памятаючы, з якой менавіта яны зарэгістраваліся, дакладна гэтак жа маглі атрымаць ануляванне запісу».

Візавая экспертка і рэдактарка рэсурсу visaflow.live Настасся Лысакоўская кажа, што, наколькі ёй вядома, практыку з праверачнымі званкамі выкарыстоўваюць упершыню.

«Званкі назіраем з 29 лістапада. Мне пакуль паведамлялі, што тэлефануюць з візавых цэнтраў Мінскай акругі. Інфармацыі па іншых акругах пакуль не паступала, — расказвае суразмоўца. — Усе праверкі, пра якія мне вядома, адбываюцца па снежаньскіх запісах, у асноўным набіраюць за пару дзён да падачы. Сутнасць — удакладніць, як чалавек запісаўся. Калі з нечай дапамогай, даведваюцца, ці гэта было праз агенцтва. Калі заяўнік адказвае станоўча, рэгістрацыю анулююць.

Здаралася, людзі адказвалі, што ім дапамагалі сваякі. Хутка даведацца ў іх высланы на пошту код не атрымлівалася. Запіс у гэтых выпадках анулявалі не заўсёды».

Па словах Настассі, бывала, чалавек не заўважыў званок і не зняў слухаўку. Пасля ён прыязджаў у ВЦ у патрэбную яму дату і, «паскандаліўшы», падаваўся.

«Усё гэта рандомна, кагосьці, хто не адказаў, разварочвалі. Але пакуль у большасці выпадкаў, пра якія я чула, калі не датэлефаноўваюцца, прапускаюць, — кажа яна. — Ёсць сітуацыі, калі чалавеку, які не зняў слухаўку, на пошту дасылалі код. Мая парада: перад паходам на падачу праверце мэйлы і ідзіце да іх з кодам».

Адна з магчымых прычын з'яўлення званкоў — барацьба з «памагатарамі».

Нягледзячы на гэта, кажа Настасся, людзі ўсё адно не перастануць звяртацца ў агенцтвы, бо «запісацца на падачу самому складана».

«Мая рэкамендацыя, але не інструкцыя: калі вам тэлефануюць і прадстаўляюцца, што гэта супрацоўнікі ВЦ, удакладніце, з кім вы размаўляеце, і з асаблівай асцярожнасцю раскрывайце персанальныя даныя», — рэзюмуе суразмоўніца.

• 15
• 3
• 11
• 9
• 4
• 1
• 7
• 0