Беларус з'ездзіў у Германію з нямецкім «шэнгенам», але амбасада яму не паверыла і адмовіла ў наступнай візе
Адзін з чытачоў выдання «Анлайнер», мінчук Міхаіл, як і многія беларусы, збіраўся атрымаць шэнгенскую візу, каб паехаць у адпачынак. Мужчына падышоў да гэтага даволі адказна: яшчэ мінулай вясной запісаўся ў нямецкую амбасаду і да лістапада 2023-га атрымаў візу на тры месяцы. З'ездзіў па ёй у Германію і амаль адразу ж стаў у чаргу па новую. У канцы ліпеня падаў дакументы і праз 10 дзён атрымаў пашпарт з адмовай. Пазначаная ў выдадзеным лістку прычына ў выпадку Міхаіла гучыць абсурдна: «Вы не былі ў Германіі па папярэдняй шэнгенскай візе».
«Разлічваў як мінімум на гадавую, а тут такое. Да таго ж добра яшчэ, калі б амбасаду не задаволіла колькасць сродкаў на рахунку ці нешта падобнае, але атрымаць адмову менавіта па такой прычыне — крыўдна ўдвая. Папярэднюю візу я рабіў спецыяльна дзеля паездкі на футбольны матч «Барусія» — «Баварыя».
Акрамя Дортмунда, удалося наведаць яшчэ і Кёльн. У агульным ліку прабыў у Германіі каля чатырох дзён, і гэта пацвярджаецца пасадачнымі талонамі, квіткамі на гульню, фатаграфіямі. Праўда, на месцы расплачваўся ў асноўным наяўнымі, а жыллё браніраваў мой спадарожнік на сваё імя. Можа, гэта паўплывала… Але як? У мяне ні выпіскі, ні броні ніхто нават не пытаўся!» — разважае мінчук.
Міхаіл вырашыў проста так не пакідаць гэтую сітуацыю і падаў апеляцыю. Прыклаў да заявы ўсе наяўныя доказы свайго знаходжання ў Германіі і стаў чакаць адказу.
Роўна праз месяц беларусу патэлефанавалі з амбасады, паведамілі, што праз тыдзень чакаюць для ўклейвання ў пашпарт візы, усё ж ухваленай з другога разу.
2 верасня Міхаіл выйшаў з будынка дыпмісіі з «шэнгенам».
«Далі зноў на тры месяцы, — расчаравана расказвае мужчына. — Так, па цяперашніх часах гэта не так ужо і дрэнна, але, па-першае, у мяне згарэлі броні білетаў і жылля пад паездку, якую планаваў першапачаткова, па-другое, дзеля апеляцыі трэба было спешна прадумваць новае падарожжа.
Магчыма, доўгатэрміновая віза акупіла б усе ўкладанні і нервы, але цяпер ужо не ведаю, ці варта было яно таго наогул. Ну, хоць бы пераканаўся ў тым, што апеляцыя сапраўды працуе, так што калі хтосьці сутыкнецца з такой жа сітуацыяй, не саромейцеся спрачацца з амбасадай».
«Хутчэй за ўсё гэта была адпіска»
Па каментар з нагоды кейса Міхаіла «Анлайнер» звярнуўся ў візавае агенцтва Lime Travel. Усё ж такі сітуацыя здаецца нестандартнай і крыху дзіўнай. Па якой прычыне консул можа вырашыць, што вы схлусілі ў анкеце, хоць усе доказы адваротнага ёсць на руках? І наколькі часта сустракаюцца нелагічныя адмовы, калі ў чалавека ўсе дакументы ў парадку і сабраныя па памятцы?
«Усе пастановы аб адмовах у візе, фактычна, грунтуюцца на суб'ектыўных высновах аднаго канкрэтнага чалавека, гэта значыць консула. Пра тое, што прымусіла яго такое рашэнне прыняць, ведаць у падрабязнасцях, на жаль, ніхто іншы не можа. У выпадку Міхаіла, хутчэй за ўсё, мела месца стандартная адпіска — проста не пашанцавала.
Нейкай канкрэтнай статыстыкі па нелагічных адмовах няма. Але так, яны перыядычна здараюцца. Напрыклад, нядаўна на грэчаскі «шэнген» падаваўся бацька разам з трохмесячным сынам. Дзіцяці візу паставілі, тату — адмова.
Ці быў кейс з дзядулем, які кожнае лета на працягу многіх гадоў ездзіў у Францыю да блізкіх сваякоў па запрашэнні. Сёлета новы консул візу не выдаў. На жаль, часцяком гэты працэс — рулетка».
Колькі беларусаў былі ў Еўропе за апошнія пяць гадоў? Нават не траціна
Мінская блогерка расказала, як бясплатна атрымала італьянскі мультышэнген. Але гэты спосаб не для ўсіх
За што могуць ануляваць візу і адправіць у «візавы каранцін»?
«Іх дэпартуюць, візы анулююць». Каля 40 беларускіх турыстаў, што ехалі ў Іспанію, затрымалі ў Германіі
Пасольства Італіі вырашыла правяраць мэтавае выкарыстанне віз
Цяпер чытаюць
Памёр 50-гадовы спецназавец Буцько. Ён быў удзельнікам выкрадання і забойства Захаранкі і Ганчара37
Каментары
Калі падаеш дакументы першы раз, то вялікая верагоднасць, што табе паставяць візу кароткатэрміновую, літаральна на час тваёй запланаванай паездкі, і ні днём больш. Ну, ці на тры месяцы якія. А наступныя разы ўжо лягчэй дабіцца шматразовай.
І вось калі хтосьці толькі пачынае гэты шлях, то яму хоцькі-няхоцькі даводзіцца змірыцца з тым, што першы раз магчымае атрыманне кароткатэрміновай візы, але праз гэта трэба прайсці. А каб мець большыя шанцы другі раз, трэба па гэтай кароткатэрміновай візе некуды ў Нямеччыну з'ездзіць. І, натуральна, туды, куды табе самому цікава. Вось гэты хлопец і выбраў з'ездзіць на чатыры дні на футбол. Што ў гэтым кепскага?
А адносна "сённяшніх навін" - то гэта маніпуляцыя. Ва Украіне ідзе вайна, у Беларусі лютуюць рэпрэсіі, але гэта зусім не падстава для таго, каб закапваць сябе ў зямлю і не жыць.