«Мая кампанія пацярпела ад неабдуманых дзеянняў апазіцыі». Што адбываецца з фірмай, на экранах якой паказалі зварот Ціханоўскай супраць вайны
24 лютага 2024 года на рэкламных экранах у Беларусі запусцілі зварот Святланы Ціханоўскай. Акцыю правяло аб'яднанне былых сілавікоў Belpol. Праз суткі сілавікі затрымалі чатырох супрацоўнікаў кампаніі Legion 104, якая займалася размяшчэннем рэкламы на падобных экранах. «Медыязона» паразмаўляла з дырэктарам кампаніі Андрэем Смаляком і даведалася, што адбываецца з фірмай і крымінальнай справай праз 10 месяцаў пасля «дыверсіі».
Крымінальная справа, арышт маёмасці і ліквідацыя кампаніі
Пасля з'яўлення звароту Ціханоўскай на рэкламных экранах следчыя распачалі крымінальную справу па артыкуле аб знішчэнні, блакаванні або мадыфікацыі камп'ютарнай інфармацыі. Смаляк праходзіў па ім падазраваным, але летам прадпрымальнік атрымаў ліст, што крымінальную справу супраць яго спынілі і цяпер ён праходзіць сведкам. Каго следчыя лічаць падазраваным, невядома.
Дырэктар таксама расказаў, што па гэтым артыкуле ў рамках справы «аб экранах» ніхто з ягонай фірмы не затрыманы.
«Справу паставілі на паўзу, чакаюць мяне як галоўнага сведку на допыт. Мая нерухомасць арыштаваная. ДФР працягвае праверку, выніку пакуль няма, але нічога добрага ад іх я не чакаю. Усе падаткі мы аплацілі, цяпер пакрываем невялікую запазычанасць перад кліентамі. Супрацоўнікі звольніліся», — расказвае дырэктар.
Цяпер кампанія Legion 104 знаходзіцца ў працэсе ліквідацыі. Да інцыдэнту ў ёй працавалі 10 чалавек, а таксама 7 чалавек — пазаштатна.
«Бізнэс пераносім у Еўропу і на Блізкі Усход. Убачылі для сябе значна больш магчымасцяў. Цяпер шукаем інвестара», — расказвае прадпрымальнік.
«Нас спісалі»
«Дзеля справядлівасці, я не рэпрэсаваны ўладай непасрэдна. Мая кампанія пацярпела ад неабдуманых дзеянняў нашай «роднай» апазіцыі. Як і казаў раней, яны нас спісалі. Мне шчыра шкада нашу зямлю і наш народ. Нейкі бесперспектыўняк».
Прадпрымальнік адмаўляе дачыненне да трансляцыі звароту Ціханоўскай. Пра тое, што іх сэрвіс быў узламаны, ён даведаўся па дарозе ў Польшчу — ехаў святкаваць свой дзень нараджэння.
«Працуючы над праектам з 2015 года і выдаткаваўшы на яго велізарную колькасць сіл і рэсурсаў, мы не маглі сабе дазволіць нешта падобнае».
Адказнасць за акцыю ўзялі на сябе былыя сілавікі з Belpol. Яны пацвердзілі, што затрыманыя супрацоўнікі кампаніі Legion 104 да ўзлому экранаў ніякага дачынення не маюць.
«Ніхто з датычных да правядзення акцыі не знаходзіцца ў Беларусі. Што ўласна і пацвярджаецца, бо людзей затрымалі нібыта проста за пратэсты», — сказаў прадстаўнік ініцыятывы Уладзімір Жыгар.
На пытанне «Медыязоны» пра тое, ці атрымаў Belpol доступ да сэрвісу Legion 104 без ведама супрацоўнікаў, прадстаўнік ініцыятывы не адказаў.
Дырэктар рэкламнай кампаніі, на чыіх экранах паказалі Ціханоўскую, расказаў сваю версію падзей
«Ніхто з датычных не знаходзіцца ў Беларусі». У «Белполе» расказалі пра трансляцыю выступу Ціханоўскай на маніторах
Затрымалі супрацоўнікаў кампаніі, што абслугоўвае экраны, на якіх паказалі зварот Ціханоўскай
На рэкламных экранах па ўсёй Беларусі паказалі зварот Святланы Ціханоўскай
Стаў вядомы змест «аперацыі №4» з плана «Перамога». Ажыццявіць яе больш не атрымаецца
Цяпер чытаюць
Медсястра з Лепеля закахалася ў расійскага вайскоўца і паехала наёмніцай на фронт ва Украіну12
Каментары
Той, хто падставіў, не пытаючыся дазволу, той "маладзец"?