У канцы 2024 года на «Беларуськаліі» пачалася новая хваля палітычных звальненняў за актыўнасць у 2020-м. Пра гэта выданню «Люстэрка» расказала крыніца, знаёмая з сітуацыяй. Паводле яе слоў, звальненні працягнуліся і ў 2025-м: людзей выклікаюць на размову з кіраўніцтвам, пасля чаго звальняюць «адным днём».
Ігар (імя змененае) працаваў на «Беларуськаліі» да 2021 года. У верасні 2020-га ён далучыўся да страйку на прадпрыемстве, праз што быў звольнены. Цяпер мужчына жыве ў адной з еўрапейскіх краін.
Былыя калегі Ігара, якія працягваюць працаваць на прадпрыемстве, паведамілі мужчыну пра новую хвалю звальненняў. Яна пачалася ў канцы снежня 2024-га і працягнулася пасля Новага года. За гэты час звольнілі некалькі дзясяткаў чалавек на чацвёртым рудаўпраўленні «Беларуськалія».
«Штодня ў працоўны час па чатыры-пяць чалавек выклікаюць на размову да кіраўніцтва, пасля чаго «адным днём» звальняюць, — сцвярджае Ігар. — Калі хтосьці не згодны, то выклікаюць сілавікоў і ў кайданках выводзяць за браму».
Інфармацыю Ігара «Люстэрку» пацвердзіў Дзмітрый (імя змененае), яшчэ адзін былы супрацоўнік «Беларуськалія», які звольніўся ў 2020 годзе.
Паводле яго звестак, атрыманых ад былых калег у Салігорску, звальненні праходзяць не толькі на чацвёртым рудаўпраўленні, але і па ўсім «Беларуськаліі».
«Зноў звальняюць за падзеі 2020 года — акцыі, каментары ў сацсетках, назіранне за выбарамі і да таго падобнае. Прыехалі «дзядзькі ў пагонах» [на прадпрыемства]», — сцвярджае мужчына.
Ігар таксама кажа, што супрацоўнікаў «Беларуськалія» працягваюць звальняць «за палітыку». Мужчына звязвае гэта з прыходам на прадпрыемства новага кіраўніцтва.
«Звальненні за палітычную актыўнасць былі і раней, пасля страйку 2020 года яны ідуць хвалямі, — тлумачыць Ігар. — У лістападзе 2024-га Лукашэнка прызначыў Ігара Рыбакова новым генеральным дырэктарам «Беларуськалія». Той, мабыць, вырашыў выслужыцца шляхам правядзення новых чыстак супрацоўнікаў.
Новае кіраўніцтва дабівае тых, каго пашкадавала старое. Яны паднялі спісы тых, хто падпісаўся за страйк у 2020-м. Неафіцыйна прад'яўляюць менавіта гэта, але фармальна кантракт разрываюць па пагадненні бакоў. У выпадку нязгоды пагражаюць праблемамі з міліцыяй».
Сустрэчу Рыжанкова з Сікорскім папрасіў Мінск. Што каманда Ціханоўскай абмяркоўвала з палякамі да і пасля яе11
Каментары