Камерай, пастаўленай у адным з польскіх лясоў, зафіксаваныя два чорныя ваўкі. Запіс, зроблены арганізацыяй аховы прыроды, дае магчымасць глыбей вывучыць генетыку гэтых загадкавых драпежнікаў, піша Onet.pl.
Нечаканыя кадры былі знятыя ў мінулым годзе фотапасткай, якую паставіла Яана Тачыдлоўская, каардынатарка праекта SAVE Wildlife Conservation Fund Poland. Гэты факт падштурхнуў даследчыкаў да збору пробаў з лесу для аналізу генетыкі чорных ваўкоў.
Спачатку Тачыдлоўская паставіла камеру для назірання за бабрамі, але пабачыўшы, што яна фіксуе ваўкоў, вырашыла пакінуць яе на месцы. Праз некаторы час ёй удалося атрымаць відэа з чорным ваўком.
На адным з кадраў відаць, як чорны і шэры воўк павольна пераходзяць ручай і выходзяць на бераг. Іншае відэа, знятае восенню мінулага года, паказвае двух чорных і шэрых ваўкоў, якія пераадольваюць той жа ручай.
Большасць з 2,5—3 тысяч ваўкоў, якія жывуць у Польшчы, маюць шэрую афарбоўку. Чорнае футра з’яўляецца вынікам генетычнай мутацыі, якая, імаверна, узнікла ў свойскіх сабак тысячагоддзі таму.
Цёмная афарбоўка ваўкоў рэдка сустракаецца ў Еўропе з-за нізкай генетычнай разнастайнасці. Але, напрыклад, у Нацыянальным парку Елаўстоўн у ЗША прынамсі палова папуляцыі ваўкоў мае чорнае футра.
Ваўкі жывуць сямейнымі групамі, а паколькі чорныя экзэмпляры важаць каля 30 кг (як нямецкія аўчаркі), то Яана Тачыдлоўская мяркуе, што яны з’яўляюцца аднагодкамі і, верагодна, братамі. Прынамсі адзін з іх — самец.
Арганізацыя SAVE Wildlife Conservation Fund Poland, якая 13 гадоў сочыць за ваўкамі ў Польшчы, не раскрывае дакладнае месца знаходжання чорных ваўкоў, каб абараніць іх ад браканьераў і спыніць распаўсюд дэзынфармацыі.
Ваўкі былі цалкам зніклі ў Польшчы ў 1950-х гадах, але ў апошнія дзесяцігоддзі іх папуляцыя аднавілася, асабліва ў цэнтральнай частцы краіны.
На мінулым тыдні фонд SAVE Wildlife Conservation Fund Poland аб'явіў у фэйсбуку пра назіранне за чорнымі ваўкамі і звярнуўся па фінансавую падтрымку. Сабраныя сродкі дапамогуць фінансаваць генетычныя даследаванні, якія дазволяць лепш зразумець мутацыю, адказную за чорную афарбоўку ваўкоў.
Памерла палітзняволеная Алена Панкова. Паўгода назад яе асудзілі за ўдзел у пратэстах7
Каментары