«Недзе, можа, паставіў лайк не той». На БТ паказалі чарговага беларуса, які прыехаў на радзіму праз камісію па вяртанні
Мужчыну, які напісаў у камісію пад кіраўніцтвам генпракурора Андрэя Шведа заяўку на вяртанне і атрымаў на яго дазвол, завуць Кірыл Данількевіч. Раней ён у публічнай сферы не з'яўляўся, вядома толькі, што мужчына са Слоніма.
Кірыл Данількевіч расказвае, што выехаў у Польшчу яшчэ да 2020 года і жыве там ужо 5 гадоў, адпаведна ў пратэстах не ўдзельнічаў. Але ў галаве, маўляў, «ад пачатку была не зусім правільная пазіцыя», таму мог недзе «паставіць лайк не той».
Цяпер жа, хоць за мяжой у яго нявеста з дзіцём, ён засумаваў па радзіме, дзе засталася мама і дзе за час ягонай адсутнасці памерлі дзве бабулі, на пахаванне якіх мужчына не прыехаў. Калі наважыўся, напісаў у ГУБАЗіК, тыя перанакіравалі ў камісію па вяртанні, а ў ёй Данількевічу сказалі, што ніякіх спраў на яго не заведзена — можна вяртацца.
За гэтую ласку ён цяпер расказаў прапагандыстцы Ксеніі Лебедзевай, як за мяжой у яго мяняліся погляды. Першым штуршком для гэтага стаў, маўляў, нейкі запісаны сілавікамі ў 2021 годзе ролік, у якім у фігуравалі Святлана Ціханоўская «са сваёй шушарай», якія нібыта абмяркоўвалі, што трэба браць сілай нейкі палац у Гомелі. Пасля ж, калі пачалася вайна ва Украіне, ён спачатку таксама быў не на баку Пуціна і Лукашэнкі, але пасля ўсё ж нейкім чынам такі прыйшоў да думкі, што «нас хацелі прадаць». Для больш пераканаўчай ілюстрацыі гэтага тэзісу ён паўтарае прапагандысцкія наратывы, што на Захадзе «мы нікому не патрэбныя».
Сёння генеральны пракурор Андрэй Швед, выступаючы на аб'яднаным пасяджэнні Палаты прадстаўнікоў і Савета Рэспублікі, расказаў, што «камісія па вяртанні» за час сваёй працы разгледзела 241 зварот, у выніку чаго ў Беларусь вярнуліся 20 чалавек з больш чым 30, якія атрымалі станоўчы адказ.
Усім, хто вярнуўся на радзіму праз камісію, паводле слоў генпракурора, «прапануецца расказаць праўду пра тое, як ім там жылося за мяжой, якое стаўленне рэальнае да беларусаў».
Цяпер чытаюць
«Думаеце, я гэты пашпарт дома не шукала?» Вольга Сямашка пракаментавала сітуацыю з дакументам прыкрыцця свайго мужа16
Каментары