Дэпутат і гісторык Ігар Марзалюк расказаў пра сваю сям'ю і тое, ці карыстаецца сын яго дэпутацкім статусам.
Жонка Марзалюка Алена працуе вядучым навуковым супрацоўнікам у Музеі гісторыі Магілёва. Пазнаёміліся яны на археалагічных раскопках.
Марзалюк дзеліцца: дома ён не камандуе.
«Хаджу на задніх лапах. Наогул, калі мужчына любіць па-сапраўднаму, ён імкнецца зрабіць так, каб тая жанчына, якую ён любіць, (…) адчувала сябе абароненай і каб у яе было мінімум дыскамфорту ад усялякіх мужчынскіх выбрыкаў і выхадак. Я розны дома. У мяне выбухны характар, я халерык. Але я стараюся быць добрым па-максімуме»,
— расказаў гісторык на праграме БТ «100 пытанняў даросламу».
Марзалюк кажа, што ў некаторых рэчах і не імкнецца быць галоўным.
«Дапусцім, рэдкі мужчына самадастаткова вызначыцца ў краме без спісу, які яму падрыхтуе клапатлівая жонка. Ёсць рэчы, дзе я сябе не адчуваю кампетэнтным, скажам так».
«У Марзалюка шмат у чым класічная гісторыя «шэршэ ля фам», менавіта жонка яго ўвесь час падбухторвала выбівацца ў людзі, пераязджаць у Мінск, падтрымліваць уладу», — расказваў раней «Радыё Свабода» магілёўскі апазіцыянер.
З сынам Альгердам у Марзалюка блізкія адносіны.
«Мы з ім пайшлі і займаліся разам Він Чун кунг-фу, армейскім рукапашным боем. (…) На раскопкі ён са мной ездзіў», — згадвае ён выхаванне.
Ці часта сын Марзалюка карыстаецца тым, што бацька дэпутат?
«Мне было б сорамна. А як ён будзе карыстацца? Я што, калі ён вучыўся ў школе альбо ва ўніверсітэце, хадзіў яму ацэнкі выпрошваў? (…) Калі ў цябе ёсць пачуццё самадастатковасці, ты не будзеш ніколі прыніжацца. Гэта прыкмета слабасці. Калі хтосьці думае, што я ішоў проста як бульдозер і прасеку расчышчаў, ну, гэта не. Іншая справа, што я стараўся па максімуме дапамагаць у тым плане, укласці ў яго, каб ён і мовы добра ведаў, і ўсё астатняе, каб ён выглядаў годна».
Каментары