«Яны самі паклікалі мяне ў гэты чат, а цяпер называюць мярзотнікам». Галоўрэд Atlantic расказаў, чаму апублікаваў перапіску амерыканскіх сілавікоў у Signal
Галоўны рэдактар часопіса Atlantic Джэфры Голдберг, якога дарадца прэзідэнта ЗША па нацыянальнай бяспецы Майк Уолц выпадкова дадаў у групавы чат у мэсэнджары Signal, дзе амерыканскія сілавікі абмяркоўвалі планы атакі на хусітаў у Емене, у інтэрв'ю карэспандэнтцы Бі-бі-сі Сары Сміт расказаў, як усё адбывалася — і патлумачыў, чаму часопіс наважыўся апублікаваць усю перапіску цалкам.
«Ведаеце, мне б хацелася, каб гэта было нешта ў духу Ле Карэ, — кажа Голдберг, маючы на ўвазе брытанскага аўтара шпіёнскіх раманаў Джона Ле Карэ. — Але было так: ён [Уолц] запрасіў мяне [у чат] пагутарыць. Я пагадзіўся. І вось я ўжо ў гэтым вельмі дзіўным групавым чаце з кіраўніцтвам службаў нацыянальнай бяспекі Злучаных Штатаў».
Уолц прызнаў, што гэта ён дадаў Голдберга ў групавы чат у Signal, але заявіў, што з журналістам ён не знаёмы.
«Я б не пазнаў яго, калі б сутыкнуўся б з ім або калі б паліцыя прапанавала мне апазнаць яго», — сказаў дарадца Трампа.
Аднак Голдберг сцвярджае, што яны сустракаліся з Уолцам некалькі разоў. Журналіст адмовіўся раскрываць дэталі іх узаемаадносін.
«Ён, вядома, можа казаць усё, што хоча, але я не буду каментаваць нашы адносіны ці іх адсутнасць, — кажа Голдберг. — Як журналісту мне некамфортна публічна гаварыць пра адносіны, якія ў мяне могуць быць або адсутнічаць з людзьмі, якія трапляюць у загалоўкі навін».
У любым выпадку, ва Уолца мусіў быць нумар тэлефона Голдберга, інакш ён не змог бы дадаць журналіста ў чат у Signal.
Дарадца Трампа па бяспецы сказаў, што ён папрасіў Ілана Маска — паплечніка амерыканскага прэзідэнта і тэхналагічнага мільярдэра — разабрацца з тым, як у яго з'явіўся кантакт Голдберга.
«Сур'ёзна, вы адправіце Ілана Маска разбірацца, як чыйсьці нумар апынуўся ў кагосьці ў тэлефоне? Ведаеце, большасць васьмігодак могуць з гэтым справіцца», — каментуе Голдберг ідэю Уолца.
У першай публікацыі Atlantic былі прыведзеныя не ўсе цытаты з перапіскі ў Signal, а сякія-такія дэталі і падрабязнасці наўмысна не публікаваліся. Але пасля таго, як адміністрацыя прэзідэнта стала прымяншаць значнасць інфармацыі з чата і абвінаваціла Голдберга ў хлусні, часопіс вырашыў апублікаваць скрыншоты ўсёй перапіскі.
Ці цяжкае гэта было рашэнне?
«Калі Дональд Трамп сказаў, што там [у чаце] няма нічога такога, па сутнасці, а [кіраўнік Нацыянальнай разведкі] Талсі Габард і [дырэктар ЦРУ] Джон Рэткліф сказалі, што там не было адчувальнай інфармацыі, не было сакрэтнай інфармацыі і гэтак далей, мы падумалі — ну не, мы з гэтым не згодныя, — тлумачыць Голдберг рашэнне Atlantic апублікаваць усё змесціва чата. — Яны кажуць, [што там нічога няма], а ў нас ёсць уся гэтая перапіска, так што, напэўна, людзі павінны яе ўбачыць».
На публікацыю скрыншотаў Белы дом і Пентагон адказалі, што гэта не «ваенныя планы», а значыць, нічога сакрэтнага ў дэталізаваным апісанні таго, калі знішчальнікі F18, дроны і «тамагаўкі» павінны атакаваць цэлі ў Емене, няма.
«Калі Піт Хегсет — міністр абароны — паведамляе мне, што вось-вось будзе нанесены ўдар па Емене, піша, якая менавіта авіяцыя будзе задзейнічаная, якая зброя будзе выкарыстоўвацца і што бомбы павінны паразіць цэлі праз дзве гадзіны — мне гэта здаецца адчувальнай інфармацыяй, інфармацыяй, звязанай з планаваннем ваенных дзеянняў», — кажа Голдберг.
Ёсць і іншы важны момант.
«Ці павінны вы, кіраўнікі службаў нацыянальнай бяспекі, абмяркоўваць гэта ў Signal на сваім тэлефоне?» — пытанне гучыць рытарычна.
Галоўны рэдактар Atlantic трапіў і пад асабістыя атакі. Прэзідэнт Трамп назваў яго «няўдачнікам» і «мярзотнікам», а Уолц, які сам дадаў журналіста ў чат, — «хлусам» і «мярзотай».
«Гэта ўласцівая ім манера паводзін: ніколі не абараняйся, толькі атакуй, — каментуе Голдберг. — Гэта значыць, я сядзеў, займаўся сваімі справамі, яны самі паклікалі мяне ў гэты чат у Signal, а цяпер яны нападаюць на мяне і называюць мярзотнікам. Чагосьці я тут не разумею».
Трамп абараняе сваю каманду і, падобна, не збіраецца нікога звальняць, называючы скандал «паляваннем на ведзьмаў», якое нібыта зладзіла прэса. Але, па словах Голдберга, у Белым доме многія думаюць, што Уолц зрабіў сур'ёзную памылку, і ўсур'ёз занепакоеныя тым, як улады адрэгавалі на тое, што адбылося.
«Дапусцім, ты вайсковец, лётчык, працуеш з ЦРУ і Дзярждэпартаментам, і ты абыходзішся з адчувальнай інфармацыяй неналежным чынам, так, як гэта зрабілі гэтыя людзі — што з табой будзе? Цябе звольняць, цябе адправяць пад суд», — разважае Голдберг.
З ягоных слоў, у палітычных элітах пайшлі размовы, што да людзей з адміністрацыі Трампа ўжываюцца свае, асаблівыя стандарты адказнасці.
Прысутнасці ў чаце старонняга чалавека ніхто з яго 17 удзельнікаў так і не заўважыў. Голдберг сам выйшаў з яго неўзабаве пасля таго, як зразумеў, што гэта не розыгрыш, а размова сапраўдных амерыканскіх сілавікоў. [Ён зрабіў гэта пасля таго, як удар па пазіцыях хусітаў быў нанесены ў пазначаны ў перапісцы час].
Галоўны рэдактар Atlantic кажа, што гэта было праявай адказнасці з яго боку. Але некаторыя журналісты з цяжкасцю паверылі ў тое, што ён выйшаў з чата па добрай волі.
«Нейкая частка мяне вельмі хацела б ведаць, што там было далей. Але тут узнікае шмат праблем, звязаных з законам і этыкай, і іншых пытанняў, у якія я не магу ўдавацца, — тлумачыць Голдберг. — Паверце, я прыняў гэтае рашэнне, атрымаўшы парады ад розных людзей».
Чарговы скандал з адміністрацыяй Трампа: журналісты знайшлі ў інтэрнэце персанальныя даныя топ-чыноўнікаў
На абвінавачанні ў хлусні Atlantic апублікаваў новыя скрыншоты з урадавага чата ў Signal. Трамп адказаў новымі абразамі ў адрас галоўнага рэдактара
«Ён добры чалавек». Трамп не стаў звальняць свайго дарадцу пасля ўцечкі інфармацыі ў чат Signal
Міністр абароны ЗША адмаўляе ўцечку ваенных планаў праз чат у Signal. А Кангрэс патрабуе расследавання
Дарадца Трампа па нацбяспецы выпадкова дадаў журналіста ў сакрэтны чат у Signal. Раскрытыя механізмы прыняцця рашэнняў
Каментары