Кандыдат на міністра замежных спраў Германіі: Расія хацела зрабіць Украіну васалам як Беларусь
Галоўным кандыдатам на пасаду міністра замежных спраў Германіі лічыцца нямецкі палітык Армін Лашэт, які прадстаўляе блок ХДС / ХСС. У вялікім інтэрв'ю Bild Лашэт узгадаў і Беларусь.
Адносна палітыкі да Расіі ў размове з журналістамі Лашэт падкрэсліў, што лічыць, што ў міжнароднай палітыцы «трэба размаўляць з усімі». Але заўважыў, што ў яго ніколі не было рамантызаванага стаўлення да гэтай краіны.
Палітык назваў сябе «дзіцёнкам халоднай вайны», для якога Савецкі Саюз заўсёды быў імперскай пагрозай.
«Мэтай расійскай вайны было захапіць Украіну за тры дні, усталяваць там марыянеткавы ўрад і фактычна зноў зрабіць Украіну васальнай дзяржавай як Беларусь. Гэта было намерам. Для Украіны поспех, што атрымалася захаваць сваю незалежнасць, нягледзячы на тое, што Пуцін хацеў далучыць да сябе», — сказаў ён.
Лашэт думае, што ў Трампа атрымаецца дамагчыся пагаднення па вайне ва Украіне.
«Шольца крытыкавалі за тое, што ён так шмат тэлефанаваў [Пуціну]. А цяпер раптам усе хочуць сесці за стол перамоў з Пуціным і Трампам. Гэта нейкая занадта рэзкая змена пазіцыі», — адзначыў палітык.
Армін Лашэт раней мала выказваўся па пытаннях знешняй палітыцы, але ў 2014 годзе Die Welt уключыла яго ў спіс «пуцінферштэераў» — тых, хто «разумее» Пуціна.
Тады ў інтэрв'ю Frankfurter Allgemeine Zeitung ён паскардзіўся на «антыпуцінскі папулізм». На думку Лашэта, «нават калі рэферэндум у Крыме парушаў міжнароднае права, усё роўна неабходна ставіць сябе на месца суразмоўцы», пісаў Цэнтр Карнэгі. Да поўнамаштабнага ўварвання Лашэт заклікаў «не дэманізаваць Пуціна».
«Беларусь цябе любіць». Рэпартаж з развітання з Мікітам Мелказёравым8
Каментары