Заснавальнік Microsoft Біл Гейтс падчас закрытых слуханняў у Кангрэсе ЗША па справе Джэфры Эпштэйна пацвердзіў, што ў мінулым меў пазашлюбныя адносіны з дзвюма жанчынамі з Расіі — гульцом у брыдж Мілай Антонавай і фізікам-ядзершчыцай Карымай Нігматулінай, піша The Times.
Адвакаты мільярдэра дамагліся, каб слуханні, якія прайшлі яшчэ 10 чэрвеня, адбываліся ў закрытым рэжыме. Аднак на гэтым тыдні камітэт апублікаваў стэнаграму яго паказанняў.
Згодна з апублікаваным тэкстам, Біл Гейтс удакладніў, што на момант рамана адной з жанчын было ад 20 да 30 гадоў, а другой — ад 30 да 40 гадоў.
Гейтс паведаміў, што падчас іх знаёмства Карыма Нігматуліна была звязаная з кампаніяй TerraPower, у якую ён інвеставаў. Ён таксама заявіў, што не абмяркоўваў з ёй Эпштэйна і нічога не ведае пра магчымыя кантакты паміж імі.
Карыма Нігматуліна — дачка вядомага расійскага навукоўца Роберта Нігматуліна. Яна атрымала адукацыю ў Прынстанскім універсітэце і Масачусецкім тэхналагічным інстытуце, працавала ў ЗША, а пазней вярнулася ў Расію і стала прафесаркай Расійскай акадэміі навук.
Падчас слуханняў Гейтс таксама расказаў, што Эпштэйн, магчыма, ведаў пра яго пазашлюбныя сувязі і мог разглядаць магчымасць шантажу. Сам Гейтс сцвярджае, што шантажу не было, але з электроннай перапіскі вынікала, што Эпштэйн цікавіўся гэтай тэмай.
Асобна абмяркоўваліся чарнавікі лістоў, у якіх сцвярджалася, што Гейтс нібыта асцерагаўся заражэння венерычнай хваробай ад адной са сваіх знаёмых і шукаў спосаб лячыць былую жонку Мелінду Фрэнч Гейтс без яе ведама. Гейтс адхіліў гэтыя сцвярджэнні і заявіў, што ніколі не хварэў на інфекцыі, якія перадаюцца палавым шляхам, і не даваў нікому лекі таемна.
Таксама ён прызнаў яшчэ адзін пазашлюбны раман — з доктарам медыцынскіх навук Эліс Джэйкабс Несельрод. Паводле яго слоў, гэтыя адносіны завяршыліся яшчэ да знаёмства з Эпштэйнам.
Акрамя таго, Гейтс паведаміў, што сустракаўся з Эпштэйнам прыкладна 12—14 разоў у перыяд з 2010 па 2014 год і двойчы размаўляў з ім праз Skype. Пры гэтым ён адзначыў, што не выключае, што мог апынуцца ў адной кампаніі з людзьмі, якія пазней былі прызнаныя ахвярамі Эпштэйна, хаця раней адмаўляў такую магчымасць.
Самому Білу Гейтсу абвінавачанні ў сексуальным гвалце або ўдзеле ў злачынствах Эпштэйна не выстаўляліся.
Перасцярогі перад «новымі Жыткавічамі». Кіеў дарма бачыць пагрозу ў будаўніцтве мастоў цераз Прыпяць і Мухавец31
Каментары