Яўгенія, жонка былога добраахвотніка Васіля Верамейчыка, расказала «Нашай Ніве» пра цяжкі стан яго здароўя. Праз сур'ёзныя праблемы з сэрцам палітвязня ўжо дадалі ў гуманітарныя спісы.
Праблемы ў Васіля пачаліся, яшчэ калі ён знаходзіўся ў СІЗА. Тады Верамейчык скардзіўся на сімптомы, што ўказваюць на праблемы з сэрцам: боль у грудзях, дыхавіца, галавакружэнне, ацёкі рук і ног. Медыцынскай дапамогі ў СІЗА яму не аказалі.
У 2025 годзе Верамейчыку прысудзілі 13 гадоў калоніі і павезлі адбываць той тэрмін у шклоўскую калонію №17. Там Васілю нарэшце зрабілі абследаванне — узялі аналізы і правялі УГД сэрца. Дакладных вынікаў сям'я мужчыны не ведае, але пасля таго абследавання Верамейчыку прызначылі кропельніцы і выпісалі ажно чатыры моцныя прэпараты: аспікард, клопідагрэл, аторвастатын і метапралол.
Яўгенія падзялілася заключэннем незалежнага доктара на аснове інфармацыі пра стан Васіля:
«Ёсць прыкметы сур’ёзнага сардэчна-сасудзістага захворвання, верагодна, ішэмічнай прыроды, з высокай рызыкай трамбатычных ускладненняў. Прызначаная тэрапія (антыагрэганты, бета-блакатары, статыны) характэрная для пацыентаў пасля інфаркту міякарда або з высокай рызыкай яго развіцця. Стан патрабуе пастаяннага медыцынскага назірання і можа горшаць ва ўмовах ізаляцыі».
Сітуацыю ўскладняе тое, што ў Верамейчыка спадчынная схільнасць да сардэчна-сасудзістых хваробаў. У яго блізкіх сваякоў былі выпадкі інфарктаў і цяжкіх аперацый.
Яшчэ адной прыкметай стану Васіля яго родныя лічаць тое, што Верамейчыка ў калоніі доўгі час не адпраўлялі ў ШІЗА, хаця туды часта трапляюць палітвязні і з менш цяжкімі артыкуламі. Адміністрацыя калоніі ўдакладняла, што Васіль пазбягаў ШІЗА праз ягоныя праблемы з сэрцам.
Вясной 2026‑га ўсё змянілася — родныя Верамейчыка бачаць па абмежаваннях у камунікацыі і іншых прыкметах, што палітвязня ўжо некалькі разоў адпраўлялі ў ШІЗА. Яго таксама пазбавілі тэлефанаванняў, прадуктовых і медыцынскіх перадач.
Паводле слоў Яўгеніі, у пачатку чэрвеня Васіля мусілі перавесці ў бальніцу пры мінскім СІЗА-1, каб зрабіць яму аперацыю на сэрцы. Але замест гэтага палітвязня кінулі ў ШІЗА, а потым і ўвогуле ў ПКТ.
Там Васіль будзе яшчэ больш ізаляваны ад медычнай дапамогі, у тым ліку экстраннай. Цяжкія ўмовы ў ПКТ — тое ж ШІЗА, толькі з невялікімі паслабленнямі — небяспечныя тым, што яго сэрца, якое і так працуе на мяжы, будзе пад яшчэ большай рызыкай.
Паводле Яўгеніі, Васіля Верамейчыка дадалі ў гуманітарны спіс палітвязняў з сур'ёзнымі праблемамі са здароўем, што патрабуюць як мага хутчэйшага вызвалення.
«Наша Нiва» — бастыён беларушчыны
ПАДТРЫМАЦЬЦяпер чытаюць
«Чаму мы павінны неяк ушчэмліваць сябе?». Дырэктарка РТБД патлумачыла, чаму паставіла спектакль паводле Пушкіна ў адным з апошніх тэатраў краіны, які працаваў па-беларуску5959
Каментары
Раскажыце тады калі ласка падрабязней пра Кабанчука. Як ен спрычыніўся да арышту Васіля Верамейчыка?