«Аптымальнай у офісе лічыцца тэмпература ад +23 да +25°C». У Федэрацыі прафсаюзаў нагадалі пра патрабаванні да ўмоў працы ў перыяд спёкі
У Беларусь прыйшла спёка, сёння чакаецца да +32, на выходных і панядзелак можа быць і ўсе +37. Пра патрабаванні да ўмоў працы ў перыяд высокіх тэмператур БелТА паведамілі ў Федэрацыі прафсаюзаў Беларусі.
«Калі для офісных работнікаў, якія большую частку працоўнага часу праводзяць за камп'ютарам, аптымальнай лічыцца тэмпература ад +23 да +25°C, то для людзей, занятых фізічнай працай, гэтыя паказчыкі будуць іншымі. Гэта звязана з тым, што пры актыўнай працы арганізм выпрацоўвае больш цяпла, таму ўмовы працы павінны забяспечваць магчымасць пазбегнуць перагрэву. Разам з тым існуюць вытворчасці, дзе забяспечыць неабходны тэмпературны рэжым аб'ектыўна немагчыма з-за асаблівасцей тэхналагічнага працэсу. У такіх выпадках асаблівае значэнне набываюць дадатковыя меры абароны работнікаў», — растлумачылі ў прэс-службе.
Неабходна забяспечыць кандыцыянаванне паветра або паветранае душаванне працоўных месцаў. Таксама работнікі павінны быць забяспечаны пітной вадой.
Акрамя таго, супрацоўнікам павінны быць прадастаўлены памяшканні або спецыяльна абсталяваныя месцы для адпачынку.
Важнае значэнне мае і забеспячэнне сродкамі індывідуальнай абароны. Напрыклад, пры выбары спецадзення рэкамендуецца выкарыстоўваць паветрапранікальныя і гіграскапічныя матэрыялы, якія дазваляюць падтрымліваць камфортны мікраклімат для арганізма.
Яшчэ адной мерай абароны работнікаў з'яўляецца ўстанаўленне дадатковых рэгламентаваных перапынкаў для адпачынку. Іх працягласць, парадак прадастаўлення і пералік адпаведных работ павінны быць замацаваны ў Правілах унутранага працоўнага распарадку або ў калектыўным дагаворы. Пры гэтым такія перапынкі прадастаўляюцца ў дадатак да перапынку для адпачынку і харчавання, а не замест яго, і ўключаюцца ў працоўны час.
Асаблівая ўвага павінна надавацца работнікам, якія працуюць на адкрытым паветры. Акрамя арганізацыі пітнога рэжыму, прадастаўлення спецыяльных перапынкаў і месцаў для адпачынку, наймальнік можа карэктаваць рэжым працы з улікам умоў надвор'я.
Пры моцнай спёцы (звыш +30°C) у асобных арганізацыях можа змяняцца рэжым працоўнага дня.
У ФПБ нагадалі, што паведаміць пра факты парушэнняў патрабаванняў аховы працы або неналежныя ўмовы працы можна па адзіным бясплатным нумары 8 801 100 1111. Спецыялісты міжгаліновага маніторынгавага цэнтра ФПБ працуюць штодня з 08:00 да 20:00.
Каментары