Стала вядома, як Трамп хоча націснуць на Кітай у развязанай гандлёвай вайне
Адміністрацыя Трампа хоча прымусіць саюзнікаў адмовіцца ад супрацоўніцтва з Кітаем у абмен на зніжэнне тарыфаў.
Адміністрацыя Дональда Трампа плануе выкарыстаць перамовы аб тарыфах, каб прымусіць гандлёвых партнёраў ЗША абмежаваць свае сувязі з Кітаем, піша The Wall Street Journal.
Стратэгія прадугледжвае заключэнне дамоўленасцяў, паводле якіх ЗША скасуюць або знізяць гандлёвыя бар’еры ў абмен на ізаляцыю кітайскай эканомікі.
Паводле плана, ЗША будуць прасіць больш як 70 краін не дазваляць Кітаю адпраўляць тавары транзітам, не даваць кітайскім кампаніям магчымасці абыходзіць тарыфы праз лакалізацыю вытворчасці, а таксама не прымаць у сябе танныя прамысловыя тавары з Кітая. Мэта — аслабіць эканоміку КНР і знізіць яе перамоўныя магчымасці перад магчымай сустрэчай Трампа і Сі Цзіньпіна.
Ініцыятарам такой стратэгіі стаў міністр фінансаў ЗША Скот Бэсэнт, які актыўна ўдзельнічае ў гандлёвых перамовах пасля абвяшчэння Трампам 90-дзённай паўзы ва ўвядзенні тарыфаў для большасці краін, акрамя Кітая.
Гэтая ініцыятыва стала часткай шырэйшага плана ізаляцыі кітайскай эканомікі, які падтрымліваецца многімі службоўцамі ў адміністрацыі Трампа.
Аднак канчатковая мэта палітыкі Трампа адносна Кітая пакуль не вызначаная. Бэсэнт падкрэслівае, што магчымасць для перамоў з Пекінам яшчэ існуе, але для гэтага неабходны ўдзел Трампа і Сі. Прэс-сакратарка Белага дому Кэралін Левіт кажа, што ініцыятыва цяпер у руках Кітая: «Кітай мусіць заключыць здзелку з намі. Мы не абавязаныя рабіць гэта з імі. Кітай хоча аднаго — амерыканскага спажыўца».
На фоне гэтага Кітай таксама актывізуе сваю дыпламатыю: Сі Цзіньпін нядаўна наведаў В’етнам — краіну, якая моцна пацярпела ад тарыфаў ЗША — і падпісаў дзясяткі эканамічных дамоўленасцяў. Як адзначыў Пітэр Харэл, былы дарадца па міжнароднай эканоміцы ў Савеце нацбяспекі ЗША пры Байдэне, Пекін умела карыстаецца сітуацыяй, хоць яго магчымасці адказаць абмежаваныя. Ён адзначыў, што Кітай «не стане заменай ЗША як крыніцы попыту для многіх краін, што развіваюцца».
Хоць ЗША і з’яўляюцца «чыстым імпарцёрам», Кітай усё больш робіць стаўку на самадастатковасць. Эксперты прагназуюць, што стратэгія Трампа можа стварыць Кітаю эканамічныя цяжкасці, але Пекін здольны эфектыўна выкарыстоўваць палітычны бок сітуацыі.
ЗША ў рамках гандлёвай вайны з Кітаем увялі на кітайскія тавары пошліны ў памеры 145%, Пекін адказаў увядзеннем пошлін у 125%.
Цяпер чытаюць
Палітолаг Аліна Харысава пагадзілася супрацоўнічаць з СБУ. Аказалася, гэта было КДБ36
Каментары