Над шматпавярховікамі ў Гродне з'явіліся адмысловыя паветраныя змеі, якія палохаюць птушак
Здалёк паветраны змей можна прыняць за сапраўдную птушку.
«Толькі на вас надзея! Выратуйце птушку! Чайка заблыталася ў правадах і не можа вызваліцца!», — з такім крыкам душы, падмацаваным відэазваротам, звярнулася чытачка Newgrodno.by. Яна распавяла, што птушка «б'ецца» на прывязі ўжо некалькі гадзін, але рэакцыі з боку службаў няма.
На відэа сапраўды можна заўважыць нешта падобнае да птушкі, што лунае над шматпавярховікам, а таксама шнур або вяроўку, якая цягнецца да яе з даху. Але ці магло б жывое стварэнне лётаць так доўга? Інфармацыю вырашылі праверыць асабіста. Праз некалькі дзён «птушка» ўсё яшчэ лунае над шматпавярховікам. Гэта паветраны змей. Прычым не звычайны, а імітуючы драпежніка.
Такіх паветраных змеяў усё часцей запускаюць над шматпавярхоўкамі ў Гродне, каб пазбавіцца ад сапраўдных птушак. Перш за ўсё, ад чаек.
На працягу ўжо некалькіх гадоў кожную вясну чайкі літаральна акупуюць дахі шматпавярховікаў. Падабаецца такое суседства не ўсім. Бо гэтыя птушкі славяцца сваімі гучнымі і непрыемнымі крыкамі. Прычым «канцэрты» часта пачынаюцца з усходам сонца. Улетку спаць з адкрытымі вокнамі бывае складана.
Спосабаў барацьбы з птушкамі не так ужо і шмат. Напрыклад, разбураць іх гнёзды вясной забаронена законам.
Каментары