Запальныя шведы, вясёлыя эстонцы, Ізраіль рве сэрца: сёння захапляльны фінал Еўрабачання
Сёння ў швейцарскім Базэлі пройдзе фінал «Еўрабачання». «Наша Ніва» сабрала відэа найцікавейшых выступаў.
Конкурс не пакажуць па беларускім тэлебачанні. Але ў Беларусі ўсё роўна можна глядзець конкурс — хутчэй за ўсё, будзе трансляцыя на афіцыйным ютуб-канале «Еўрабачання».
KAJ — Bara Bada Bastu (Швецыя)
Краіна, якая выйграла ўжо сем «Еўрабачанняў», нацэлілася на восьмую перамогу. Для гэтага яна пасылае ў Базэль гурт KAJ — трох фінаў, якія спяваюць па-шведску, прычым гэта першая песня на нацыянальнай мове ад шведаў з 1998 года.
Трэк Bara bada bastu напісаны на фінскім дыялекце шведскай мовы і прысвечаны фінскай саўне. Букмекеры прарочылі шведам перамогу на сёлетнім «Еўрабачанні» яшчэ да таго, як быў выбраны прадстаўнік краіны — паглядзім, ці спраўдзіцца прагноз.
Louane — Maman (Францыя)
Ад пастаянных фаварытаў «Еўрабачання» пераходзім да штогадовых няўдачнікаў. Францыя часта адпраўляе на конкурс вакальна складаныя песні на нацыянальнай мове — згадаем спевака Slimane, які ў 2024-м праспяваў частку песні без мікрафона. Але ж краіне стабільна не шанцуе на конкурсе: апошняя перамога ў іх была яшчэ ў 1977-м, а іх найлепшы вынік апошняга часу — той самы Slimane і яго 4-е месца.
Сёлета Францыя адсылае песню ў сваім звычайным для «Еўрабачання» стылі, што заслугоўвае павагі, але наўрад ці дапаможа краіне спакусіцца на перамогу — такія суворыя законы конкурсу. Але чаму б нам проста не ацаніць прыгожы трэк?
Ziferblat — Bird of Pray (Украіна)
Нашы суседзі пасылаюць у Базэль нешта вельмі незвычайнае. У сваёй песні яны аб'ядналі і традыцыйныя ўкраінскія матывы, і стылістыку хіпі, і трошкі панку. Што да тэксту, гэта гісторыя пра расстанне і птушку, якая можа злучыць людзей на адлегласці.
У фінале нацыянальнага адбору Ziferblat выступалі ў фіялетавых рэтракасцюмах на сцэне, стылізаванай пад квітнеючы лужок. Асаблівай пастаноўкі ў нумары і не было. Хочацца верыць, што да Базэля ўкраінцы гэта выправілі, і мы атрымаем стылёвы нумар — еўрапейскія гледачы іншага не даруюць.
Yuval Raphael — New Day Will Rise (Ізраіль)
А вось гэта — гісторыя пра натхненне. 7 кастрычніка 2023-га ізраільцянка Юваль Рафаэль прысутнічала на сумна вядомым музычным фестывалі Supernova, куды наляцелі баевікі ХАМАС. Тады загінулі 378 удзельнікаў фестывалю. Юваль была адной з тых, хто выжыў.
Цяпер яна рэпрэзентуе Ізраіль з прыгожай песняй пра тое, што «новы дзень прыйдзе». Прыхільнікі прапалесцінскіх поглядаў заклікаюць забаніць Ізраіль на конкурсе, але арганізатары супраць.
JJ — Wasted Love (Аўстрыя)
Аўстрыйская опера на «Еўрабачанні»? Так! Wasted Love, песня спевака JJ, якраз створаная ў такім стылі.
Уражвае моцна, тым больш пераможца 2024 года, швейцарац Nemo, таксама ўключаў у сваю кампазіцыю оперны кавалак. Але ці спрацуе рэцэпт поспеху другі год запар? І ці здолее JJ даць рады ўжывую такой тэхнічна складанай кампазіцыі? Калі ўсё ўдасца — не здзівімся першаму месцу ад журы для Аўстрыі.
Tommy Cash — Espresso Macchiato (Эстонія)
А вось і адзін з тых дзівакоў, якіх мы чакаем кожнае «Еўрабачанне». Спявак пад псеўданімам Томі Кэш прадстаўляе песню на сумесі англійскай мовы і таго, што можна апісаць як аўтарскае разуменне італьянскай. Вы не паверыце, але італьянцы ўжо выказалі сваё абурэнне — маўляў, у песні багата клішэ пра Італію накшталт кавы і мафіёзі.
На шчасце, мы не італьянцы і можам спакойна атрымаць задавальненне ад гэтай песні. Нездарма Томі Кэш спявае на вясёлай трасянцы «No stresso, no stresso, no need to be depresso».
Shkodra Elektronike — Zjerm (Албанія)
Яшчэ адны электроншчыкі, ды яшчэ і з фальклорнымі матывамі ды песняй на нацыянальнай мове. Песня з назвай, што перакладаецца як «полымя», адсылае да албанскіх традыцый, дзе полымя шануюць ужо шмат стагоддзяў і выкарыстоўваюць у рытуалах.
У кліпе да відэа Беатрычэ, удзельніца дуэта Shkodra Elektronike, танчыць у стылізаванай версіі хублеты — албанскага народнага адзення. Спадзяёмся, у сцэнічнай версіі будзе не менш павагі да традыцый.
Katarsis — Tavo Akys (Літва)
Букмекеры не маюць асаблівых надзей наконт гэтай кампазіцыі, але не адзначыць яе было б несправядліва. Пакуль шмат іншых краін выбіраюць бяспечную поп-стылістыку, нашы суседзі вязуць на конкурс незвычайны, прыгожы і стылёвы індзі-рок.
Тут няма вычварных спецэфектаў і натоўпу падтанцоўкі, ёсць толькі выканаўцы і іх эмацыйная песня. Паглядзім, ці ўдасца ў Katarsis рэалізаваць задуму такога выступу на належным узроўні.
«Наша Нiва» — бастыён беларушчыны
ПАДТРЫМАЦЬ
Каментары
• СЭКСЫСЦКАЯ МАДОННА •
🔺А Юваль Рафаэль, дарэчы, дзяўчына. :) І гэта пры тым, што Рафаэль іхняе роднае менавіта мужчынскае імя біблейскага паходжаньня! Таксама біблейскі Юваль (што значыць, ручай ці прыток) быў менавіта сынам (то бок, зацемлю, не дачкой!) Лямэха й Аіды.
🔺Ці возьмем (у думках у рукі) Рон Пэрэтз — незвычайна прыгожую «томную» сьпявачку з тых краёў. Хоць у сяняшнім — навошта бегаць ў часы Хры́стаса? — Ізраілі Роны Пэрэтзы гэта барадатыя эканамісты й футбалісты, і «протчыя» альфы й бруталы.
🔺Затое для расейцаў Янка — жаночае імя, таму ў Беларусі мусіць быць цалкам скасаванае вывучэньне «Ідыётаў» Дастаеўскіх і ўсіх Пушкіных, покуль яны хоць бы даведаюцца, хто такія Янка Купала, Янка Брыль і Янка Маўр. Але Валя — сьмех у роце! — часта ў іх «это мужік», узгадайма таго ж гапічнага тэлефоназнаўцу Вілсакома.
🔺«Эрых Марыя Рэмарк хоць баба, але як піша!» — казалася яшчэ ў старое показцы. А ў нашае цяперака, што прэтэндуе на ролю плоцевага мікстэра, гэткія «няправільныя» імí разглядаюцца пэўнымі яшчэ зь няўцямным гонарам за гэндэрную роўнасьць.
.