«Беларусь, што з інтэрнэтам? Працуе праз раз!»: карыстальнікі А1 скардзяцца на праблемы, кампанія праблему прызнае
Датэлефанавацца ў службу тэхнічнай падтрымкі А1 немагчыма, запыты ў сацыяльных сетках кампанія ігнаруе, а віртуальны памочнік прызнаецца: «На гэты момант існуюць тэхнічныя цяжкасці ў працы інтэрнэта і тэлебачання».
У сацыяльных сетках беларусы з розных гарадоў краіны скардзяцца на тое, што і мабільны, і хатні інтэрнэт ад А1 ледзь-ледзь працуе. Пра тэхнічныя праблемы людзі паведамляюць апошнія дні, але гэтай ноччу яны сталі найбольш моцнымі.
Карыстальнікі скардзяцца, што ніякія сайты не грузяцца, а сацсеткі падгружаюцца вельмі павольна. Праз гэта нехта нават трапіў у вельмі непрыемную сітуацыю.
Адна дзяўчына распавяла ў трэдс, што каля трох гадзін ночы ёй трэба было выклікаць таксі ў аэрапорт: «І менавіта ў тую хвіліну, як трэба выклікаць таксі — знік інтэрнэт: і вайфай, і мабільны А1. Я ў паніцы з чамаданамі спускаюся на вуліцу. Ноч, нікога няма, таксі не выклікаецца, сто халодных патоў, што спазняюся на ўсе самалёты. Праз хвілін 15 бачу ўдалечыні постаць хлопца. Крычу, каб спыніўся. Ён мусіць і сам спалохаўся, бо ноч. Фух, выклікаў мне таксі». Праблема была яшчэ і ў тым, што дзяўчына не мела з сабой беларускіх грошай — толькі даляры, бо планавала выклікаць таксі праз дадатак, а плаціць аўтаматычна карткай.
Афіцыйнай інфармацыі ад кампаніі А1 з гэтай нагоды пакуль не было. Пад апошнім забаўляльным відэа ў афіцыйным інстаграме А1 каля сотні каментарыяў ад абураных карыстальнікаў. Людзі незадаволены тым, што не атрымалі нават ніякіх паведамленняў ад правайдару сувязі. Каментарыі пакуль праігнараваныя, на прыватныя паведамленні прадстаўнікі кампаніі ніяк таксама не адказваюць.
Датэлефанавацца ў службу тэхнічнай падтрымкі ў людзей не атрымліваецца. Віртуальны памочнік на сайце адзіны, хто прызнае наяўнасць праблемы: «На гэты момант існуюць тэхнічныя цяжкасці ў працы інтэрнета і тэлебачання. Нашы спецыялісты ўжо займаюцца вырашэннем пытання».
Цяпер чытаюць
Што ў рэальнасці адбылося пад Смалявічамі? Вось самая лагічная прычына налёту ашалелых расійскіх малалетак3
Каментары