На працягу лета ў Беларусі плануюць масавы маніторынг месцаў купання. Гаворка ідзе як пра дазволеныя пляжы, так і пра стыхійныя, расказаў прэс-сакратар МНС Беларусі Яўген Бараноўскі ў Нацыянальным прэс-цэнтры.
Прадстаўнік МНС патлумачыў, што ў тым ліку будуць выкарыстоўваць для маніторынгу пляжаў беспілотныя лятальныя апараты — гэтая практыка паказала сябе як вельмі эфектыўная.
Будуць выкарыстоўваць і авіяцыю МНС, у першую чаргу яе задзейнічаюць для маніторынгу пажаранебяспечнага становішча. Але на лета карэктуюць маршрут, каб захопліваць стыхійныя месцы адпачынку, дзе людзі могуць знаходзіцца ў небяспечных умовах. Інфармацыя пра гэта будзе паступаць у раённыя падраздзяленні па надзвычайных сітуацыях і прадстаўніцтвы Таварыства ратавання на водах.
Яўген Бараноўскі таксама падкрэсліў, што на тэрыторыі Беларусі створана 495 дазволеных месцаў для купання, якія атрымалі пашпарт аб'екта і адпавядаюць патрабаванням заканадаўства. На іх ёсць ратавальнікі. Каб людзям, якія адпачываюць, было прасцей знаходзіць такія месцы ў сваім горадзе ці рэгіёне, МНС распрацавала інтэрактыўную карту пляжаў.
Каментары