Амерыканскі мільянер прыехаў у Польшчу, каб набыць футбольны клуб, і насмерць падавіўся варэнікам
Амерыканскі бізнэсмен польскага паходжання Томас Какасіньскі, які прыехаў у Польшчу, каб набыць частку вядомага футбольнага клуба «Вісла» з Кракава, памёр пры трагічных абставінах. Яму было ўсяго 42 гады.
4 чэрвеня падчас вячэры ў адным з рэстаранаў Какасіньскі падавіўся варэнікам і быў шпіталізаваны ў крытычным стане. Медыкі змагаліся за ягонае жыццё некалькі дзён, але 10 чэрвеня, з-за незваротнага пашкоджання мозгу, было прынята рашэнне адключыць яго ад апарата штучнага дыхання.
Какасіньскі прыехаў у Кракаў, каб завяршыць перамовы наконт укладання 5 мільёнаў даляраў у клуб і набыцця мінарытарнага пакета акцый. Ён ужо планаваў перавесці першы мільён у найбліжэйшыя дні, а поўную здзелку хацелі завяршыць цягам трох месяцаў.
З 2010 года бізнэсмен узначальваў амерыканскую металаапрацоўчую кампанію Metalogic Industries. Ён быў шчыра захоплены развіццём кракаўскай «Віслы», рэгулярна наведваў яе матчы і ўнутры краіны, і за яе межамі.
Прэзідэнт клуба Яраслаў Крулеўскі адзначыў, што бізнэсмен быў сапраўдным прыхільнікам каманды, як і ён сам калісьці, і хацеў быць часткай праекта надоўга.
Прапаганда прычапілася да «дарагога» гадзінніка Латушкі. Той расказаў, што гэта за мадэль насамрэч36
Каментары