«Прапанаваў грошы». Беларуска распавяла, як КДБ спрабаваў яе вербаваць
Праваабарончы цэнтр «Вясна» 11 чэрвеня расказаў пра спробы Камітэта дзяржаўнай бяспекі вербаваць беларусаў за мяжой праз Facebook. Паведамлялася, што не менш як пяць прадстаўнікоў дыяспары атрымалі паведамленні ад карыстальніка Maria Pulkovskay з прапановай супрацоўніцтва.
«Люстэрка» знайшло беларуску, якую КДБ спрабаваў завербаваць ужо пасля таго, як праваабаронцы апублікавалі інфармацыю.
Вольга жыве ў адной з краін Еўрапейскага саюза. З Беларусі жанчына з’ехала пасля 2020 года з-за пагрозы крымінальнага пераследу, звязанага з удзелам у пратэстах. Нядаўна ў Facebook яна атрымала паведамленне ад нейкай Maria Pulkovskay.
— Паведамленне прыйшло ўжо пасля таго, як «Вясна» паведаміла пра сувязь гэтага акаўнта з КДБ, — распавядае беларуска. — Я пацікавілася, што ад мяне трэба. Суразмоўца (ці суразмоўніца — складана сказаць) адразу ж паведаміў, што піша мне з будынка па праспекце Незалежнасці, 17, у Мінску.
Па згаданым адрасе ў беларускай сталіцы знаходзіцца Камітэт дзяржаўнай бяспекі. Вольга не спалохалася і працягнула размову.
— Мне пералічылі «заслугі» перад рэжымам, назвалі некалькі маіх балявых месцаў і прапанавалі супрацоўніцтва, — сцвярджае яна. — Прасілі паведамляць пра ўсе актыўнасці дыяспары і мерапрыемствы дэмакратычных сіл, што адбываюцца ў горадзе, дзе я жыву.
Вольга кажа, што супрацоўнік КДБ ёй не пагражаў, але намякаў, што ў выпадку адмовы паспрабуе стварыць праблемы. Якія — не ўдакладніў. За згоду прапанаваў грошы.
— Дакладную суму не назваў, сказаў, што гэта залежыць ад каштоўнасці атрыманай інфармацыі, — распавяла жанчына. — Паабяцаў, што ганарар я магу атрымаць у крыптавалюце або бяспечным пераводам на мой банкаўскі рахунак.
Па словах Вольгі, ад супрацоўніцтва яна адмовілася.
Нагадаем, праваабарончы цэнтр «Вясна» паведамляў прынамсі пра пяць нядаўніх выпадкаў вярбоўкі беларусаў з-за мяжы праз Facebook. Усе паведамленні зафіксаваны з аднаго акаўнта — Maria Pulkovskay. У ім дзве фатаграфіі дзяўчыны, на якіх не бачна твару. Напісана, што жыве ў Празе. Некаторым з тых, хто атрымліваў прапановы, абяцалі бяспеку іхных родных у Беларусі ў абмен на супрацоўніцтва з беларускімі спецслужбамі.
Каментары