Новае апытанне карыстальнікаў сэрвісу знаёмстваў Tinder паказала, што маладыя людзі цэняць шчырасць больш за вобраз мача. Старым канонам першых спатканняў яны ўсё часцей кажуць «не».
Як піша Welt.de, у апытанні, праведзеным інстытутам Opinium у гэтым годзе па замове Tinder, прынялі ўдзел тры тысячы немцаў ва ўзросце ад 18 да 25 гадоў. Яго вынікі паказалі, што дапушчальна для новага пакалення на спатканнях, а што не.
Абмен паведамленнямі ў той жа вечар
Класічнае для міленіялаў «правіла трох дзён», якое дазваляе патэлефанаваць ці напісаць пасля першай сустрэчы толькі на чацвёрты дзень, цяпер амаль не працуе. 73% хлопцаў і 75% дзяўчат лічаць нармальнай перапіску ў той жа вечар.
Шчырыя размовы пра сэкс
Прыблізна палова (51%) апытаных адкрыта ставіцца да сэксуальнай тэматыкі і можа абмяркоўваць яе ўжо на першай сустрэчы. Але гэта не азначае, што інтымная блізкасць для іх з'яўляецца нормай: для каля 40% маладых людзей і прыкладна паловы дзяўчат сэкс на першым спатканні — табу.
Хто плаціць у рэстаране
Калі справа даходзіць да рахунку, погляды розняцца. 59% маладых мужчын хочуць аплаціць абед або вячэру цалкам. Сярод гетэрасэксуальных дзяўчат толькі 45% лічаць, што гэта абавязак партнёра-хлопца.
Што сапраўды прываблівае
Паводле апытання, найбольш прывабнымі лічацца тыя, хто не хавае сваіх эмоцый: 72% дзяўчат аддаюць перавагу эмацыйнаму інтэлекту (здольнасць чалавека разумець уласныя эмоцыі і эмоцыі іншых людзей, кіраваць імі і выкарыстоўваць гэта разуменне для лепшых узаемаадносін і прыняцця рашэнняў) перад знешнасцю «класічных мача».
84% хацелі б бачыць побач чалавека, які падтрымлівае іх мэты і дапамагае развівацца. Пры гэтым патэнцыйны партнёр павінен цалкам засяродзіцца на спатканні: 61% лічаць флірт з іншым чалавекам формай здрады, і нават проста перапіска ў інтэрнэце з іншымі для многіх з'яўляецца непрымальнай.
Чаго не варта рабіць на першым спатканні
Ёсць і іншыя моманты ў паводзінах патэнцыйнага партнёра, якія абсалютна непрымальныя падчас першага спаткання. Кожны трэці апытаны (35%) называў непавагу да іншых галоўным фактарам, які іх адштурхоўвае, затым ідуць пастаянныя размовы пра былога партнёра (28%) і слабая камунікацыя (26%).
Без гульняў і без «гостынгу»
Пакаленне Z не любіць тактычных гульняў накшталт «не быць занадта даступным». 56% аддаюць перавагу адразу выказвацца пра свае намеры. 64% лічаць, што «гостынг» (рэзкае спыненне якіх-небудзь адносін без папярэджання і тлумачэння магчымых на тое прычын) горшы за прамое «не».
Псіхічнае здароўе і сур’ёзныя размовы
Апытанне таксама паказала, што для пакалення Z важна абмеркаванне падчас першага спаткання тэмы псіхічнага здароўя.
Адкрытасць у размове пра ўласнае псіхічнае здароўе або тэрапію ўспрымаецца як прыкмета сталасці і здольнасці да самааналізу. 64% хлопцаў і 70% дзяўчат заявілі, што адчуваюць большую сімпатыю да чалавека, які не баіцца адкрыта закранаць гэтую тэму.
Той, хто ўжо на этапе знаёмства адкрыта гаворыць пра свой эмацыйны стан, відавочна не мае жадання весці пустыя размовы. Замест гэтага многія абмяркоўваюць мэты ў кар'еры і адносінах: 30% падчас спаткання ахвотна гавораць пра асабістае развіццё, а 32% — пра кар'еру. Пры гэтым 72% лічаць прывабным, калі чалавек можа ясна сфармуляваць, чаго чакае ад адносін.
Пары, якія пазнаёміліся ў інтэрнэце, менш шчаслівыя? Вось што кажа новае даследаванне
«Скажу пра сціпласць беларусаў — мы былі голыя, а ён не паглядзеў на мае цыцкі». Дзяўчаты — пра нестандартныя спатканні
Псіхолаг: Мужчынам лепш не ставіць фота з шашлыком на сайце знаёмстваў
Контрадэйтынг: новы падыход да спатканняў, які дапаможа перазагрузіць асабістае жыццё
Цяпер чытаюць
Чаму ўлады маўчаць пра прычыны разбурэння дома ў Гомелі і якія ёсць версіі2
Каментары