«Даехаць сям'ёй да Вільні і назад, аддаўшы больш за 1,5 тысячы рублёў — гучыць з галіны фантастыкі, але гэта ператвараецца ў рэальнасць»

Днямі стала вядома, што два перавозчыкі адмянілі шэраг рэйсаў па маршруце Мінск — Вільня — Мінск. Кампаніі былі вымушаныя прыняць такія меры з-за папярэджання Літоўскай адміністрацыі па бяспецы транспарту — там заявілі, што колькасць аўтобусаў, якія перасякаюць мяжу, перавышае дазволеную. На фоне гэтага беларусы сталі хутка раскупляць квіткі, якія засталіся. Цэны на некаторыя з іх прыкметна падскочылі.

Сям'я мінчанкі Святланы (імя зменена) яшчэ ў ліпені купіла квіткі на верасень да Вільні і назад. Тады квіток у адзін бок абышоўся ім у 170 рублёў на кожнага.

«Калі з'явіліся навіны аб адмене рэйсаў, я спалохалася. Але наш перавозчык не трапіў пад абмежаванні. Затое цэны на квіткі моцна выраслі, — расказвае Святлана «Салідарнасці». — Цяпер на канец верасня квіток абыдзецца ў 270 рублёў у адзін бок на аднаго. На нашу сям'ю з трох чалавек гэта была б пераплата парадку 600 рублёў.

Сказаць, што гэта занадта — наогул нічога не сказаць. Калісьці да Вільні можна было даехаць за 120 рублёў у абодва бакі (а былі часы, калі і танней), а цяпер — за 540».

Жанчына расказаае, што выбрацца з Беларусі ў іншую краіну цяпер вельмі дорага. Толькі на візы сям'я выдаткавала каля 800 рублёў.

«А аўтобус да Вільні каштуе нашмат даражэй, чым потым пералёт у іншую краіну. Гэта зусім непараўнальна. І гэта яшчэ незразумела, які будзе час чакання і ці будуць спадарожныя «пернікі» ў выглядзе гутарак і праверак на мяжы.

Мы не ведаем, што нас чакае, і ад гэтага зусім не весела. Перыядычна пачытваем чаты, каб разумець, да чаго рыхтавацца. Вось нядаўна чытала, што з Літвы ў Мінск максімальна складана вярнуцца. І гэтыя абмежаванні не часовыя, а назаўжды. Адпаведна, будуць расці цэны астатніх рэйсаў і незразумела, да якога ўзроўню.

Даехаць сям'ёй да Вільні туды-назад і аддаць больш за 1,5 тысячы рублёў — гучыць з галіны фантастыкі, але гэта ператвараецца ў рэальнасць. У нас віза на паўгода, хацелася б некалькі разоў кудысьці з'ездзіць. Але, думаю, ужо наўрад ці. Цэны жахлівыя. А калі ў сям'і больш за адно дзіця, то тым больш.

Раней мы кожны год ездзілі адпачываць у Турцыю. Але цяпер і яна вельмі дарагая — нават па раннім браніраванню цэны выраслі. Ёсць яшчэ нашы санаторыі. Але там, па-першае, усё забіта грамадзянамі іншай краіны — яны за год браніруюць. Па-другое, цэны там таксама кусаюцца.

Знаёмы нядаўна ездзіў у «сярэдненькі» санаторый — аддаў 2,5 тысячы рублёў за 10 дзён. А так — тое, што я чытаю ў суполках — каля 100 даляраў у суткі без усялякіх даплат. І гэта не прэміум-санаторыі кшталту «Пліса» або «Сосны». Выходзіць, цяпер адвальваюцца ўсе варыянты адпачынку».

Калі казаць не толькі пра адпачынак, але і эканамічную сітуацыю ў цэлым, то Святлана адзначае: цэны растуць на ўсё. Стала даражэй хадзіць, напрыклад, у тэатр і кавярні. Вельмі моцна таксама падаражэлі і прадукты ў крамах:

«Слова «разбушаваліся» нават мяккае. Такіх цэнаў, як сёлета, не было ніколі, усе скардзяцца. Была нядаўна на Камароўцы — амаль уся сезонная садавіна па 5-7 рублёў. У цэлым я бачу, што вярнуўся час, калі гародніну сталі вырошчваць не для продажу, а для сябе.

Ужо часам думаеш: а ці не купіць мне стэйк на Новы год? Гэта значыць — загадзя. Ну і рыба стала вельмі дарагая, прычым не прэміяльная. Скумбрыя 17 рублёў, хек 15-17. І кальмары нядаўна знервавалі. Раней былі па 12 рублёў за кіло. Потым яны зніклі. Цяпер з'явіліся, але ўжо па 22 рублі».

• 0
• 1
• 0
• 0
• 0
• 2
• 0
• 0