У Цэнтральным дзіцячым магазіне на маскоўскай Лубянцы (які па звычцы часта называюць старой назвай «Детский мир») 24 жніўня адбыўся выбух геліевага балона, прызначанага для надзімання паветраных шарыкаў. Адзін чалавек загінуў, а двое атрымалі траўмы — ім адарвала рукі. Сярод пацярпелых, як аказалася, ёсць супрацоўнік ФСБ, і не шараговы.
Балон з геліем, як паведамляецца, стаяў на трэцім паверсе магазіна каля кавярні «Шакаладніца» і разгерметызаваўся. Пажару ў выніку выбуху не ўзнікла, але ў памяшканні з’явіўся дым.
Адзін чалавек загінуў, двое атрымалі цяжкія траўмы — ім адарвала рукі. Пацярпелыя — 55-гадовы мужчына і 53-гадовая жанчына — былі шпіталізаваныя ў НДІ імя Скліфасоўскага. Трэцяя жанчына (40 гадоў) фізічна не пацярпела, але ў яе была панічная атака.
Адным з траўмаваных, як высветлілася пасля, аказаўся 55-гадовы супрацоўнік ФСБ Аляксей Цітоў, які займаў у ведамстве кіраўнічую пасаду. Як паведаміла яго жонка, Цітоў знаходзіцца ў шпіталі ў штучнай коме, у яго сур’ёзна пашкоджаныя ногі.
Як мяркуецца, ён прыйшоў у дзіцячую краму з будынка, у якім працуе, які знаходзіцца непадалёк. На месцы здарэння была знойдзена яго службовая сумка з пасведчаннем.
Следчы камітэт Расіі завёў крымінальную справу «па факце інцыдэнту», але канкрэтны артыкул Крымінальнага кодэкса не пазначаны.
Расійскія СМІ адзначаюць, што відэа з наступствамі выбуху, якое спачатку было выстаўлена ў тэлеграм-канале Дэпартамента аховы здароўя Масквы, пасля было выдалена, што прыцягнула ўвагу назіральнікаў.
Цяпер чытаюць
Пасля паездкі за межы ЕС таямніча знік Анатоль Котаў, былая правая рука Паўла Латушкі47
Каментары