U maskoŭskim «Dziciačym śviecie» adbyŭsia vybuch, paciarpieŭ supracoŭnik FSB
U Centralnym dziciačym mahazinie na maskoŭskaj Łubiancy (jaki pa zvyčcy časta nazyvajuć staroj nazvaj «Dietskij mir») 24 žniŭnia adbyŭsia vybuch hielijevaha bałona, pryznačanaha dla nadzimańnia pavietranych šarykaŭ. Adzin čałaviek zahinuŭ, a dvoje atrymali traŭmy — im adarvała ruki. Siarod paciarpiełych, jak akazałasia, jość supracoŭnik FSB, i nie šarahovy.
Bałon z hielijem, jak paviedamlajecca, stajaŭ na trecim paviersie mahazina kala kaviarni «Šakaładnica» i razhiermietyzavaŭsia. Pažaru ŭ vyniku vybuchu nie ŭźnikła, ale ŭ pamiaškańni źjaviŭsia dym.
Adzin čałaviek zahinuŭ, dvoje atrymali ciažkija traŭmy — im adarvała ruki. Paciarpiełyja — 55-hadovy mužčyna i 53-hadovaja žančyna — byli špitalizavanyja ŭ NDI imia Sklifasoŭskaha. Treciaja žančyna (40 hadoŭ) fizična nie paciarpieła, ale ŭ jaje była paničnaja ataka.
Adnym z traŭmavanych, jak vyśvietliłasia paśla, akazaŭsia 55-hadovy supracoŭnik FSB Alaksiej Citoŭ, jaki zajmaŭ u viedamstvie kiraŭničuju pasadu. Jak paviedamiła jaho žonka, Citoŭ znachodzicca ŭ špitali ŭ štučnaj komie, u jaho surjozna paškodžanyja nohi.
Jak miarkujecca, jon pryjšoŭ u dziciačuju kramu z budynka, u jakim pracuje, jaki znachodzicca niepadalok. Na miescy zdareńnia była znojdziena jaho słužbovaja sumka z paśviedčańniem.
Śledčy kamitet Rasii zavioŭ kryminalnuju spravu «pa fakcie incydentu», ale kankretny artykuł Kryminalnaha kodeksa nie paznačany.
Rasijskija ŚMI adznačajuć, što videa z nastupstvami vybuchu, jakoje spačatku było vystaŭlena ŭ telehram-kanale Departamienta achovy zdaroŭja Maskvy, paśla było vydalena, što pryciahnuła ŭvahu naziralnikaŭ.
Kamientary