Продажы «Тэслы» ў Еўропе катастрафічна ўпалі. І вінаваты ў гэтым кітайцы
У ліпені еўрапейцы купілі электрамабіляў кампаніі Ілона Маска на 40% менш, чым летась. Затое продажы кітайскага BYD узляцелі больш чым утрая.
Як піша The Guardian, нягледзячы на нядаўнюю мадэрнізацыю Model Y, бізнэс электрамабіляў, якім кіруе Ілон Маск, працягвае саступаць пазіцыі кітайскім канкурэнтам.
Паводле даных Еўрапейскай асацыяцыі вытворцаў аўтамабіляў (ACEA), у краінах ЕС, Еўрапейскай асацыяцыі свабоднага гандлю і Вялікабрытаніі было прададзена 8 837 аўтамабіляў Tesla. Год назад гэты паказчык складаў 14 769 адзінак. Для кампаніі Ілона Маска гэта ўжо не першы сігнал: рынак Еўропы становіцца ўсё больш складаным.
На гэтым фоне кітайскі вытворца BYD дэманструе імклівы рост. У ліпені ў Еўропе колькасць зарэгістраваных аўтамабіляў гэтай маркі вырасла да 13503 у параўнанні з 4151 год назад. У выніку доля BYD дасягнула 1,2% еўрапейскага рынку, у той час як у Tesla яна знізілася да 0,8%.
Вясной гэтага года BYD ужо ўпершыню абышоў Tesla па продажах у Еўропе, і цяперашнія вынікі паказваюць: гэта не аднаразовая падзея, а тэндэнцыя. Асноўная перавага кітайскага брэнда — больш даступны кошт мадэляў, што робіць іх прывабнымі для шырокага кола пакупнікоў.
Рост BYD адлюстроўвае агульную тэндэнцыю: кітайскія аўтавытворцы актыўна выходзяць на еўрапейскі рынак, прапаноўваючы мадэлі ў сярэднім і бюджэтным сегментах. Гэта становіцца сур’ёзным выклікам для еўрапейскіх і амерыканскіх кампаній, якія даўно трымалі верх пераважна ў прэміяльным сегменце. Цяпер жа канкурэнцыя ўсё больш адбываецца не толькі ў тэхналогіях, але і ў кошце.
Еўрапейскія ўрады спрабуюць падштурхнуць попыт. У Вялікабрытаніі нядаўна запрацавала новая праграма субсідый на набыццё 28 мадэляў электрамабіляў, але кітайскіх сярод іх няма. Умова адна — кошт аўто не павінен перавышаць 37 000 фунтаў стэрлінгаў.
Нягледзячы на такія захады, больш папулярнымі ў параўнанні з электрамабілямі застаюцца гібрыды. У той час, як за сем месяцаў 2025 года ў ЕС было зарэгістравана больш за 1 мільён новых электрамабіляў, што складае 15,6% усяго рынку, колькасць гібрыдных мадэляў скала больш за 2,2 мільёна. Асабліва моцны рост паказалі Францыя (+30,5%), Іспанія (+30,2%), Германія (+10,7%) і Італія (+9,4%).
Як падкрэсліла кіраўніца ACEA Сігрыд дэ Врыс, каб электрамабілі сталі масавымі, Еўропе неабходна хутчэй пашыраць сетку зарадных станцый, зніжаць кошт зарадкі і ствараць скаардынаваныя праграмы падтрымкі пакупнікоў.
Віталь з-пад Вілейкі, які падпаліў хату з уласнымі дзецьмі, завербаваўся ў расійскае войска. І прапаў на першым жа баявым заданні5
Каментары
а ніякія не кітайцы?