Трамп даведаўся «цікавыя рэчы» пра Расію і Украіну, але пакуль пра іх не гаворыць
Прэзідэнт ЗША Дональд Трамп упершыню за некалькі дзён выйшаў на публіку і выступіў на прэс-канферэнцыі перад журналістамі. Ён з'явіўся са спазненнем амаль на гадзіну.
Сярод іншага ў прэзідэнта ЗША спыталіся пра вайну ва Украіне. Паміж журналістамі і ім адбыўся наступны дыялог:
— Вы размаўлялі з Пуціным на мінулым тыдні?
— Так, я не хачу… Я даведаўся некаторыя рэчы, якія будуць вельмі цікавыя, я думаю, у наступныя некалькі дзён вы даведаецеся.
— Ці будуць нейкія наступствы, калі не будзе якога-небудзь анонсу сустрэчы прэзідэнтаў Пуціна і Зяленскага?
— Так. Будуць.
— Якія?
— Паглядзім, што адбудзецца. Паглядзім, што яны зробяць, і што адбудзецца. Я вельмі ўважліва за гэтым сачу.
На пытанне, ці турбуе Трампа магчымае фармаванне восі супраць Злучаных Штатаў з удзелам Кітая і Расіі, ён адказаў:
«Не, я зусім не занепакоены. Абсалютна не. У нас самая моцная армія ў свеце, і, паверце, яны ніколі б не адважыліся прымяніць свае войскі супраць нас. Паверце, гэта было б найгоршым рашэннем, якое яны маглі б прыняць».
Хоць у той жа час ён прызнаў, што касмічную гонку ЗША нібыта прайграюць Расіі і Кітаю.
Згадаў ён і пра ініцыяваную сабой шматслойную сістэму супрацьракетнай абароны «Залаты купал» — з балістычнымі ракетамі, спадарожнікамі і сэнсарамі. Да гэтай яшчэ не створанай сістэмы ўжо нібыта моцна хоча далучыцца Канада, і ён будзе думаць, што з гэтым рабіць.
Акрамя таго, Трамп абвясціў пра перанос штаба Камандавання касмічных войскаў з горада Каларада-Спрынгс у штаце Каларада ў горад Гантсвіл у штаце Алабама. Пры гэтым ён заявіў, што Гантсвіл атрымае новую назву — «Рокет-сіці».
Гэтае рашэнне, паводле яго слоў, створыць тысячы новых працоўных месцаў і прыцягне мільярды даляраў інвестыцый. Таксама гэта дапаможа Злучаным Штатам забяспечыць абарону і ўмацаваць дамінаванне ў касмічнай сферы, якую Трамп назваў «новым высокім фронтам».
Такім чынам, Трамп адмяніў рашэнне свайго папярэдніка Джо Байдэна, прынятае ў 2023 годзе, згодна з якім штаб павінен быў застацца ў Каларада-Спрынгс. Адначасова ён рэалізаваў праект, які больш за сем гадоў актыўна прасоўвалі прадстаўнікі Рэспубліканскай партыі з Алабамы.
Пра Байдэна Трамп згадаў таксама, калі ў яго спыталіся, ці даходзілі да яго чуткі пра ўласную смерць з-за некалькідзённай адсутнасці на публіцы. Заявіўшы, што «гэта fake news», прэзідэнт ЗША сказаў:
«Я не рабіў нічога два дні, а ўсе ўжо пачалі казаць, што са мной нешта не так. Байдэн нічога не рабіў месяцамі і ніхто нічога не казаў».
«Я вельмі расчараваны ў ім». Трамп незадаволены паводзінамі Пуціна
З асабістай сустрэчай Пуціна і Зяленскага носяцца як з пісанай торбай. Але што яна насамрэч зменіць?
ЗША ў найбліжэйшыя дні разгледзяць усе магчымыя спосабы ціску на Расію
Трамп параўнаў Пуціна і Зяленскага з дзецьмі на пляцоўцы
Трамп разглядае магчымасць выкарыстання для гарантый Украіне амерыканскіх ПВК
Каментары