На Смаленшчыне спалілі 500 эквадорскіх ружаў, якія прывезлі з Беларусі
У Смаленскай вобласці супрацоўнікі мясцовага ўпраўлення Рассельгаснагляду спынілі ўвоз заражаных кветак з Беларусі.
Пры праверцы партыі з 500 зрэзаных ружаў з Эквадора, якія трапілі ў Расію праз тэрыторыю Беларусі і павінны былі паступіць атрымальнікам у Маскоўскую вобласць, спецыялісты выявілі небяспечнага шкодніка — заходняга кветкавага трыпса (Frankliniella occidentalis). Лабараторныя даследаванні пацвердзілі яго наяўнасць.
Каб прадухіліць распаўсюджанне гэтага каранціннага арганізма, увоз руж, як паведамляецца, быў забаронены, а ўся партыя знішчаная шляхам спальвання.
З пачатку 2025 года ў Смаленскай вобласці ўжо зафіксавана 22 выпадкі спробаў увозу заражаных кветак (ружы, хрызантэмы, гваздзікі) — у агульнай колькасці больш за 6,5 тысячы штук. Ва ўсіх выпадках прадукцыю не дапусцілі на тэрыторыю Расіі.
Каментары