Ціханоўская пра смерць у калоніі Андрэя Паднябеннага: Няма прабачэння тым, хто датычны да гэтага злачынства

«За кратамі памёр палітзняволены Андрэй Паднябенны. Дзявятая смерць палітвязня за кратамі, пра якую нам вядома. Цяжка падабраць словы, каб перадаць увесь боль, злосць і смутак. 

Андрэй быў любячым сынам і клапатлівым бацькам, працавітым чалавекам, але рэжым назваў яго «небяспечным тэрарыстам». 

Яго асудзілі на 16 гадоў і 8 месяцаў зняволення. Увесь час зняволення Андрэю даводзілася праходзіць праз цяжкія ўмовы і катаванні, псіхалагічны і фізічны ціск. Але нават у такіх умовах ён казаў, што гатовы адсядзець яшчэ, калі гэта дапаможа яго дзецям жыць у вольнай краіне. І за жаданне лепшай будучыні для сваёй сям’і яго спачатку пазбавілі свабоды, а ў няволі забралі самае каштоўнае — жыццё. 

Няма нічога страшнейшага, чым страціць роднага чалавека. Няма прабачэння тым, хто датычны да гэтага злачынства. Мае шчырыя спачуванні сям’і і блізкім Андрэя», — напісала Святлана Ціханоўская.

Пра смерць палітвязня стала вядома сёння. «Мае дарагія! 3 верасня не стала майго любімага сыночка!!! Мая крывіначка, мая бусінька адбываў непамернае пакаранне ў Магілёве, ПК-15. Якаясьці сволач пазбавіла яго свабоды, а затым і жыцця… Адыходзяць найлепшыя. Мае залатыя ўнучачкі засталіся без бацькі… Суцяшае толькі адно: больш ніхто не зможа ні фізічна, ні псіхалагічна здзекавацца з майго сына… » — напісала маці ў фэйсбуку.

На выбарах 2020 года Андрэй Паднябенны быў назіральнікам. Яго абурылі фальсіфікацыі, ён пісаў скаргі на начальніка камісіі ў пракуратуру. Хлопец удзельнічаў у акцыях пратэсту. На адной з такіх ён быў на машыне: за гэта быў аштрафаваны і пазбаўлены правоў.

Затрымалі Андрэя 5 лістапада 2021 года і змясцілі пад варту. 

Хлопца судзілі ў закрытым рэжыме. Яго абвінавацілі па шэрагу цяжкіх артыкулаў Крымінальнага кодэкса Беларусі, сярод якіх ч. 1 арт. 14 і ч. 3 арт. 218 (замах на наўмыснае знішчэнне альбо пашкоджанне чужой маёмасці), ч. 1 арт. 361-1 (стварэнне экстрэмісцкага фарміравання), ч. 1 і ч. 2 арт. 289 (акт тэрарызму). Андрэя абвінавачвалі ў падпале машыны начальніка ўпраўлення дэпартаменту выканання пакаранняў, праколе колаў у 39 тралейбусаў, стварэнні і адміністраванні Telegram-канала і чата, якія прызналі экстрэмісцкімі фарміраваннямі.

Суддзя Анатоль Сотнікаў прызначыў Андрэю 15 гадоў калоніі ва ўмовах узмоцненага рэжыму.

КДБ унёс Андрэя ў «спіс асобаў, датычных да тэрарыстычнай дзейнасці». Але праваабаронцы прызналі яго палітвязнем.

Потым Андрэю дадалі да асноўнага тэрміну яшчэ год і восем месяцаў зняволення. Яго дадаткова асудзілі па чатырох крымінальных артыкулах, у тым ліку за «садзейнічанне экстрэмісцкай дзейнасці» і «распальванне іншай сацыяльнай варожасці».

Палітвязень знаходзіўся ў калоніі №15 у Магілёве.

Гэта ўжо дзявятая смерць у калоніі ці турме: Вітольд Ашурак, Мікалай Клімовіч, Алесь Пушкін, Вадзім Храсько, Аляксандр Кулініч, Ігар Леднік, Дзмітрый Шлетгаўэр, Валянцін Штэрмер, Андрэй Паднябенны.

• 0
• 0
• 0
• 0
• 0
• 7
• 1
• 0